Sebastianu DALZETO (1875 - 1963)

 

 

Casata: NICOLAI

Nome: Sebastianu

Nascita: U 1u marzu 1875 in Bastia

Morte: U 3 dicembre 1963 in Ville di Petrabugnu

 

Pueta è rumanzeru, dopu avè servutu in l'armata è l'amministrazione culuniale.

 

Opere publicate:

Pesciu Anguilla, (rumanzu bastiese) 1930

La Sposata, 1933

Filidatu e Filimonda, 1963

 

Strattu:

 

FILIDATU È FILIMONDA

 

Fù un passu curiosu l'amore di Filidatu è Filimonda. Un passu à intennerì i cori i più innacciarati. Un passu cum'elli ci sò pochi passi è chì ùn si ponu cuntà chè in corsu. Perchè, sappiatela, u francese ùn puderebbi rende l'espressione nustrale. S'aghju da andà in Niolu, dicu: "Mi ne collu in Niolu". È voi tutti mi capite. È quandu voi dite à a vostra Dulcinea: "Cara, carina, caruccia! Cunsulazione di u mio core afflittu, speranza di a mio vita, anima di i mio penseri, ti amu, ti adoru, sò toiu è scimiscu. Per tè, piglierebbi a luna cù i denti, u sole cù un ancinu è a furtuna cù i lacci", voi altri, a vi ripetu, mi capite, ma nè u francese, nè l'inglese, nè u teddescu, nè u russiu ci intendenu...