Ghjacumu Fusina hè statu unuratu da i so pari à l’Università di Corsica. Li anu dedicatu scritti cullettivi adduniti sottu à u titulu « Liber Amicorum »

Frà e tradizioni accademiche in usu à l’università di Corsica Pasquale Paoli, ci hè quella chi vale à publicà un'opera cullettiva pè unurà un cullegu in fine di carriera. Cusì hè natu « Liber Amicorum » dedicatu à Ghjacumu Fusina.  A redazzione hè stata diretta da Eugène Gherardi, cù l'aiutu di Daniele Maoudj.  I ritratti d’illustrazione so di Rita Scaglia. St’opera scritta racoglie e cuntribuzioni di Toni Casalonga, Francesca Maria Ceccaldi, Jean Chiorboli, Jean-Marie Comiti, Jean-Yves Coppolani, Marie-Josée Dalbera-Stefanaggi , Suzanne Dracius, Philippe Gardy, Nedim Gürsel, Alain Di Meglio, Francis Favreau, Ghjuvan Ghjaseppiu Franchi, Florence Jean, Philippe Martel, Pasquale Ottavi, Francis Pallenti, Ernest Pépin, Philippe Pesteil, Lucette Poncin, Didier Rey, Antoine-Laurent Serpentini, Dominique Verdoni, Marie-Jeanne Verny è Michel –Claude Weiss.
Stu libru, stampatu da Sammarcelli, hè una testimunianza d'affettu è di ricunniscenza. Accerta quante rilazioni è amicizie hà avutu Ghjacumu Fusina durante a so longa è diviziosa carriera.
Hè dinù simbulu di l'umagiu à u pedagogu di prima trinca in u duminiu di a lingua è a literatura corsa, quant'è in e scienze di l’educazione. Umagiu dinù à u puetu, à u scrittore, à l’umanistu.

L'Adecec hè stata incantata di participà à a presentazione di u libru è à a so rimessa ufficiale à Ghjacumu Fusina, in a sala di l'atti di u palazzu naziunale di Corti.