· U Ringraziamentu

A fine di l'annu hè puntellata da una ceremunia religiosa : u Ringraziamentu. Cusì, i paisani volenu ringrazià u Signore di ogni favore ricevutu durante l'annu. Si cantava u " Miserere " è u " Te Deum", dopu ci era un salutu à u Santu Sacramentu. Ghjè un usu sempre assai vivu in e chjese di Corsica, ci hè assai più ghjente chè per a messa di u Capu d'annu. Cum'ellu ùn ci hè u prete, e donne chì s'occupanu di l'animazione di u " mese di Maria ", e nuvene, cantavanu u " Te Deum Laudamus ". Sì u Ringraziamentu ùn pudia esse celebratu a vigilia, si facia a mane di u Capu d'annu.

Ste pratiche religiose ùn anu fattu smarì certe credenze più anziane. À l'iniziu di u seculu, in Pioghjula, a sera, certi facianu una piccula veghja. E donne, à mezanotte, andavanu à lampà appena di risu per e fate, in a funtana.

· Questule di u Capu d'annu

Durante a prima parte di u seculu, u Capu d'annu era ghjornu di festa per tutti i zitelli.

Tutta a ghjurnata di u primu di ghjennaghju, u paese era occupatu da bande di zitelli. Partianu à l'alba, cù un saccu di tela fattu da a mamma. Purtavanu un ramu d'uliva o d'albitru (chjamatu a strenna in Felce d'Alisgiani), un ramu chì, in Alta Rocca, ùn devia mai entre in casa.

A ghjente, sapendu chì i zitelli devianu passà, appronta qualchì fruttu seccu, curcone, frittella… Dopu à a prima guerra, ghjera sopr'à tuttu una pezza di muneta. Certi pudianu dà solu qualchì castagna secca o un zuccherame.

I zitelli pichjavanu à a porta di e case, davanu un ramu s'elli ne avìanu unu è dicianu a formula rituale di u locu :

" bon dì,
bon annu,
bon capu d'annu,
bonu quist'annu,
megliu un antru annu "
(cantu di i Rimonduli)

I zitelli pigliavanu i rigali lampati da a donna di casa. U rigalu favuritu era a pezzetta d'unu o dui soldi per pudè andà à cumprà qualchì liccatura in a buttega di u paese.

Ghjera l'attività di i zitelli u primu ghjornu di l'annu in i paesi.

In Corscia (Niolu), stu rituale era fattu in duie parti :

- a prima si chjamava i pichji. I zitelli, in picculi gruppi, andavanu, à l'attrachjata di u 31 di dicembre, à pichjà à e porte di u paese. A ghjente ùn apria a porta ma rispundia cù " i saluti ". Cuminciavanu cusì : " Sì tù sì maschio ch'è tu sìa … " o " Ch'è tù abbia… " è dopu " sì tù sì femina… ", ognunu lasciava andà l'imaginazione per augurà un bel'avvene à i zitelli.

- a seconda parte si facia dopu à u Capu d'annu : e razie o e grazie. I zitelli facianu u giru di e piazze, a ghjente lampava da e finestre qualchì noce, amandula o pezzetta.

U rituale di Felce d'Alisgiani in Castagniccia : u 31 di dicembre, i zitelli andavanu da una casa à l'altra per dà " e paci ". Pichjavanu in terra cù u talcu, è recitavanu un cumplimentu assai elaburatu :

" Chì vo aghjite tantu granu
quantu petre in Sant'Appianu
Chì vo aghjite tantu vinu
quantu cotule in San Gavinu
Chì vo aghjite tanti scudi
quantu sassi ci hè in Muteri
Chì vo aghjite boi lavuratori
chì sianu i vostri onori "
(Sant'Appianu, San Gavinu è Muteri sò muntagne di l'Alisgiani)

È cosa racuglianu i zitelli ? In prima a scapula di u porcu chì si chjama " a pace ", ciò ch'averebbe datu u nome à sta pratica.

In Cervioni dinù, si pigliava e scapule. Dopu, eranu messe à coce in un paghjulone è manghjate i ghjorni di festa. U lindumane, i zitelli andavanu à dà a strenna, u ramu d'uliva.

· L'Auguri

U ghjornu di u Capu d'annu, i zitelli si svegliavanu à bon'ora per andà à salutà i genitori :
" Pace è salute ! Pace è salute ! " è i genitori rispundianu : " È ch'è vo siate sempre bravi zitelli ".

I zitelli andavanu dinù à salutà a famiglia : i caccari, zii, zie… senza scurdassi di i vicini.

L'auguri eranu presentati à a famiglia alluntanata, ghjera l'occasione di dà o riceve nutizie di u ziu di Marsiglia, u cumpare di Parigi, a cummare di e culunie … Ci era in ritornu un picculu rigalu.

· L'allegrezze

À meziornu, si facia un pranzu di festa : caprettu, porcu, salvaghjina o stuffatu cù a pasta… Dopu si manghjava un curcone fattu cù u brocciu : a strenna. U deliziu era dinù a pappula, cù a pasta levitata, fritta è zuccherata. I pezzi di pasta per fà u pane, messi accantu, eranu sciacciati, tagliati in galette tondule, durate, zuccherate è manghjate calde.

A frugalità era u fattu di u ghjornu, è ste galette eranu assai apprezzate.

Pè u Capu d'annu è i seguenti, era data à i vicini, visitanti, fattore è à tutti quelli chì passanu, appena di vinu, uva, chjarasge è bombucconi à l'acquavita.

Ci eranu bell'umore è amabilità durante a ghjurnata sana.

Urigini: Noëls de Corse, traditions et saveurs
A Mimoria, edizione Edisud

Un travagliu da Petru-Ghjuvanni Bresciani