Paghjelle nustrale

 

 

Per stu Natale di u 2004,

emu decisu di rigalavvi qualchì parolla di paghjelle :

 

Sermanu

 

Aghju fattu tutte l’arti

Zappaghjolu è sigantinu

E po(i) dop’aghju pruvatu

Ancu quellu di u mulinu

Ma a più bella hè questa

Fà tutti li ghjorni festa.

 

 

Bustanicu (Ghj. Taddei.)

 

Aghju una mosca à l’arrechja

Induve chjappu mi cunsiglia

L’aghju sempre intesu dì

À chì cerca trova è piglia

È e debbite di i babbi

E paganu a famiglia.

 

 

Racolta da a Ricuccata (Cervioni)

 

A matina di bon’ora

Si presenta u Castellanu

Po parlendu à alta voce

"Tutti à u casciò suttanu"

Quaghjò ùn sì vede luce

Solu si paspa di manu

 

 

Pianellu (Tradiziunale – Boziu)

 

À vede lu da luntanu

Pianellu mi pare un forte

Tuttu cintu à muraglioni

Per entre ci sò duie porte

È chjose ch'elle sò quesse

À chì c'entre ùn pò più sorte

 

À vede lu da luntanu

Pianellu mi pare un forte

Tuttu avvintu da muraglioni

Pè entre ci hè duie porte.

È chjose ch'elle sò quesse

À chì hè nentru ùn pò più sorte.

 

 

Sermanu. (Clemente Turchini)

 

À voi o madamicella

V'anu arapidu lu core

V'anu traditu cun un basgiu

Cum'è Ghjuda à lu Signore

Oghje vi facenu vive

Mezu à speranza è timore.

 

 

Gregale

 

Cantanu li fiumicelli

In fondu di li bassali

Chì chjamanu li zitelli

Girendu chjosi è ripali

Fischjanu li pasturelli

Le capre per li pughjali

 

 

Ricacciata da « U fogliu di Verità »

(Ghjiseppu Defranchi, di Bustanicu,

racolta da Ghjan Pasquale Turchini)

 

Ci hè duie cose chì Diu

Ùn hà mai perdutu

Chì ùn tiranu possa tene

Un populu incatinatu

Senza ch’ellu ùn si rivolti

Per vindicà li so morti.

 

 

Tradiziunale Bustanicu

 

Dumane mi ne muntagnu

O Dumè u mo culombu.

È capulu à San Cumiziu

À la punta di u ghjornu.

Ti manderaghju u frescu

Quellu di Monte Ritondu.

 

Dumane mi ne muntagnu

Facciu un felice viaghju.

È mi lasciu la mi'amica

In piazza à lu cateraghju.

M'hà prumessu di cullà(ne)

Versu lu vinti di maghju.

 

 

MOITA (Tradiziunale)

 

Moita ùn ti piacia

Ma nisunu ùn la disprezza

Ma ti sò piaciute l'acque

Di le muntagne d'Orezza

Ogni poltra chì s'affila

Strappà vole a cavezza.

Moita hè un bellu paese

Chì nisunu lu disprezza

Ma ti sò piaciute l'acque

Di le muntagne d'Orezza

Tutta poltra chì s'affila

Vole strappà la cavezza.

 

 

Gregale

 

Quand’ellu more un Pueta

Tutta la natura hè in dolu

Ùn cantanu più l’ocelli

Si tace lu russignolu

U ventu girendulendu

Porta la nova in Niolu

 

 

 

 

Travagliu di Saveriu GIACOMETTI.

Paghjelle racolte in parechji libri,  «Cantu Nustrale», «Paghjella» ed. Valle Voce da P-S Parigi.

Certe sò state trove semplicemente nant’à internet, anziani dischi, CD (Valle Voce per indettu ) ecc.

 È piu scarsule, è e piu preziose l’anu datu cantadori è paghjellaghji.

 

Paghjelle in più : http://www.paghjella.com/