Letizia Giuntini canta cum’ella respira, senza furzassi. In a so voce, ci hè l’anima petricosa di a terra è l’energia di un blues, trà lamentu è cantu di pastore. E so canzone zuccate in u legnu d’olivu, si dissetanu à a surgente fresca è parlanu di a vita, e so girandulate, e so zerghe, è l’amore sempre…

Autore, cumpunitore, interprete, Letizia Giuntini hè balanina. Da zitella, stava à sente u cantu tradiziunale, in particulare e voce di A Filetta. Dapoi qualchì annu, hà cumpostu e so canzone in corsu è in francese è induve si trova dinù u spiritu di u rock, u reggae o a pop. Canzone-storie, lode à a natura è à a vita, cù puesia è umurismu.