Festa di a lingua corsa (maghju-ghjugnu 2017)
2017-04-29 17:51:25


Gilles Simeoni, Presidente di u Cunsigliu Esecutivu di Corsica, affiancatu da Saveriu Luciani, Cunsigliere esecutivu in carica di a lingua corsa, anu presentatu l’edizione 2017 di a « Festa di a Lingua corsa », marti u 2 di maghju à 11 ore, in a sala 2 di u Gran’Palazzu di a Cullettività territuriale di Corsica à l’occasione d’una cunfarenza di stampa.
 

In u quadru di a pulitica iniziata à prò di a lingua corsa, l’Assemblea di Corsica hà vutatu un novu Pianu Strategicu di Sviluppu di a Lingua Corsa (Lingua 2020). U scopu strategicu di « Lingua 2020 » -chì s’arremba à u mezu strategicu ch’ella ripresenta a cuufficialità- hè di prumove l’usu di a lingua corsa in tutti i duminii d’usu pussibili d’una lingua viva è ufficiale, senza vuluntà d’egemunia o di monopolu. A Festa di a Lingua si scrive direttamente in sta pulitica di pianificazione per a nurmalizazione di a lingua corsa è u prugressu versu una sucetà bislingua chì 90 % di i Corsi bramanu. 

Lanciata in u 2012, « A Simana di a Lingua Corsa » hè un avvenimentu di prumuzione di a lingua corsa chì mubilizeghja, in giru à prugetti culturali è linguistichi, associ, cumune o stabilimenti di furmazione. In crescita cuntinua in quantu à u numaru di participanti è à a so ripartizione nant’à u territoriu, st’avvenimentu festivu hè diventatu dapoi u 2015 « A festa di a lingua corsa ». 

U scopu di a nostra mandatura serà, di sicuru, di cuntinuà à sustene, per via di un prugramma d’aiutu, u sforzu tamantu fattu da tutti i partenarii di a CTC. 

Oghje, sò quindeci associ, quattru cumune è duie intraprese chì anu rispostu à a nostra chjama à prugetti è ch’è no avemu da aiutà per mette in ballu u so prugramma. Ci vole à aghjunghje à sti partenarii u Greta è Aflokat, centri di furmazione per i maiò chì anu da participà à sta grande festa, è dinò u Museu di a Corsica chì, cum’è ogni annu, participeghja à sta manifestazione. 

Fatta fine, sò 260 000 € porsi da a CTC per sti dui mesi di festività à prò di a lingua corsa, di u so usu è di a so difusione. 

Da maghju à ghjugnu, è ancu al di là, sò più di 100 manifestazione in lingua corsa è per a lingua ch'ella prupone a Cullettività territuriale di Corsica cù i so partenarii. Prugramma nant'à http://www.corse.fr/linguacorsa/ 

In a Corsica sana : teatru, cantu, puesia, ghjochi, visite patrimuniale, immersione, scontri culturali, mostre, corsi di lingua è tant'altre attività aduprendu a lingua corsa cum'è cimentu di ste manifestazione.