Saviezze è malizie di Nasreddine, u scemu chì era saviu
2017-07-13 14:43:07

Emma, Timeo, Jade è l'altri cuntinueghjanu à traduce in corsu e fole di Nasreddine "Le fou qui était sage", in cullaburazione cù l'Associu pè una Fundazione di Corsica - Umani, presidatu da Jean-François Bernardini. Julien Comelli, insignante di fisica à u cullegiu aiaccinu di e Padule, abilitatu in lingua corsa è membru di l'AFC - Umani, hà messu in usu l'organizazione di a traduzzione di u libru di Jihad Darwiche.

Aldilà di a risa, i scherzosi grandi è chjuchi, ci scupreranu verità semplice è luminose cum’è u ghjornu. Una racolta di 60 storie di saviezza, trà sprupositi è ragiò. Ritruvemu sumiglie cù u nostru Grossu Minutu. Cum'è ellu, Nasreddine dinunzia i difetti di quelli di a so epuca, si ride di tutti, di u sultanu, di i so sughjetti, di i so amichi è ancu d'ellu stessu. A sfacciatezza, u spiritu, u piacè di ghjucà cù e parolle danu sempre a murale di ogni storia chì sò d'attualità.