E Cronache di Petru Mari
2017-07-18 15:12:21

Fujiyama : l'ayatolà

Scrive così triste,

Traculinà senza insiste,

Empiesi d’amara vinaccia

In a solitutine Vignalaccia.

Ghjè un piacè di firmà solu

Trà Vignale l’Olmu è Golu. 

Lasciassi andà à gode,

U finimondu chi’ ci rode,

In issu locu ch’ùn hà vistu

Firmassi à Ghjesù Cristu.

So’ un acellu in u so nidu

Nè fingu nè piangu nè ridu.

Site surpresu nè ?

 Oghje vi pigliu di ribattu.

Vi vogliu scrive una cosa trista.

Malinonica,

Da tirassi una palla.

Ghjè a fola di l’ultimu ayatolà persu in u so mondu finitu.

L’ayatolà si ne và à circà i finzi.

Ellu dice « i finzi ». Si ferma solu à dilla.

Ghjè l’ultimu ayatolà,

Si capisce

In u mondu veru si và à coglie i funghi.

In a valle ghjustu sottu Calasima dicenu « andemu à coglie i fanti »,

E si ne vanu à coglie i fanti.

Eo dicu « i funghi ».

E mi ne vo’ à coglie i funghi cum’è u picculu populu di i circataghji.

L’ayatolà , ellu, serà l’ultimu à moresi andendu à circà i finzi in a furesta di l’Altu Carabakh,

Duv’ellu ùn ci hè più u minimu finzu,

Nè sapone, nè rasoghji, nè dentifrice.

Un ci hè più nunda nunda.

Terra brusgiata.

S’hè tuttu rascatu ma ellu vole i finzi è basta.

Allora si more, benintesu.

Megliu mortu chè tuccà un fungu goffu di vugarità, dice l’ayatolà.

Ci hè una cosa chi’ li frighje:

I funghi volenu cumandà.

Volenu esse i patroni à cantu à u buletri, i galli sturzi, i muccicosi, e pete di volpi è i capineri.

U picculu populu di i circataghji, a razza di i finzi a vole stirpà.

E quessa, à l’ultimu ayatolà l’annerba.

Un la po’ suppurtà.

Purtantu fidighjate quantu u nostru mondu hè bellu, e mane assulanate di settembre dopu ch’ellu abbia piossu.,

U nostru mondu hè bracanatu di mille sapori chi’ sbuccianu sott’à i castagneti.

In Calabraca sentenu l’odore di « i fanti » sott’à i pulloni.

In Ezau di Ficaghja dicenu « i funzi »,,

In Bastia Sud « i finti »

In a periferia di Sartè usanu « i sciampignon »,

Più intellettuali, in Aiacciu dicenu « i sciampognon in buatta »,

In l’Alta Balagna so’ « e bruette ».

Si campanu.

U mondu hè bellu è s’elli si morenu i finzi serà bellu listessu.

A malincunia batte in faccia à l’ayatolà,

Ch’ùn po’ nè pianghje, nè ride, nè manghjà.

Un hà nè lettu nè vitu,

Ghjè un acellu ammullitu.

Senza femine, senza misge,

Ghjè solu

E infelice.