E cronache di Petru Mari
2017-08-17 11:12:30

Fumà a canapetta…

« Cumu Dio creò a Corsica, pensendu di fà bè »

Ghjè u titulu d’un testu chì corre nantu à Internet, mandatumi da una amica, chi’ l’avia ricevutu da un amicu, ellu stessu destinatariu d’issu scrittu trovu da una cunniscenza ind’un piuvale. 

Un tippu chi’ avia una certa pretensione.

Quand’ellu ebbe compiu di fà u mondu, Dio si pusò suddisfattu è dete una fidighjata à a so opera. 

Era propiu bella a terra, incù i so mari, e so muntagne, i so animali chì a pupulavanu, e so piante chì l’ornavanu, l’aleurode floconeuse di u mandarinu in piena prusperità è l’hyper U prontu à empie i carrittelli. 

Ma tutta issa bellezza era spapersa, senza unità.

Nisunu ne prufittava. 

A Dio li parse dunque chì qualcosa mancasse à issu mondu novu, per chì u so lavoru sia propiu un capulavoru. Pensa chì mi ti pensa è si disse : « aghju sappiutu piantà l’arburi i più belli, i fiori i più imbalsamati, e muntagne e più maestose, e marine e più serene, i fiumi i più sfrenati, è perchè ch’eo ùn inventeria un locu duv’elle serianu cuncolte tutte inseme, da multiplicassi, isse bellezze ?

Dio misse e mani in pasta è in una ghjurnata fece un locu di sognu, u Giardinu d’Eden. Ma à issa terra di splendore, ci vulia un circondu chì si preste. Dio fece sbuccià una isula, à mezu à un mare turchinu, tale un ghjuiellu tralucente. 

U Giardinu d’Eden, l’isula di bellezza era nata. 

Issa isula, era a Corsica. 

Ma a notte dopu, Dio ùn la ci fece à dorme. E so pensate eranu penserose : « Issa isula hè bella troppu, bella tantu chì tutti si ne vuleranu impatrunì è ne nasceranu ondate longhe di ghjelusia è cimicate ».  Passò a notte sana à ochji aperti per truvà una suluzione, è a mane cappiò un suspiru di cuntentezza. 

L’era sprichjata una idea : « aghju da inventà per issa isula un populu di guardiani ombrosi. Omi è donne chì a difenderanu senza arreghjesi, capaci d’armassi per parà a mio opera da l’inviliosi. Isse donne è issi omi seranu fieri, resistanti è sulidarii. Teneranu caru a so isula quant’è eo tengu a terra sana. ! ». 

È Dio creò u Populu Corsu.

U testu finisce quì.

Quistione : cosa ùn squatra in issu testu ? U fattu chì u populu corsu abbia un mandate divinu? U fattu chì l’invilia d’origine furestera, di a quale ci vulia difende l’Isula di Bellezza, sia propiu nata in u senu di u Populu Corsu chì si ne stirpava ? U fattu chì Dio si sia sbagliatu circhendu di scunfinisce a vita vera, tale ch’ellu a intendia ?

Cosa ùn squatra in issu testu ?

Umbè… 

Forse ùn ci vole à dalli, à u Vechju, a colpa di tutte e mitulugie ch’omu li presta. L’isulani nustrali sò cum’è l’altri : a canapetta chì i lega à a so isula di bellezza, i Corsi a si fumanu.