I belli ghjorni, novu dischettu di L'Abbrivu
2017-09-05 11:59:05

U gruppu L'Abbrivu festighjeghja i so 20 anni cù un quintu dischettu "I belli ghjorni". Sò sempre ottu, i listessi chè prima, ma u gruppu, e voce, l'assestamenti, i testi... si sò abbuniti. Quandu si stà sente, ci hè una vera evuluzione musicale cù creazione ritmate è chì danu u laziu di ballà, servuti da assestamenti di quelli. A putenza vucale di u cantu curale, chì hè u sustratu di u cantu corsu, hè sempre u puntellu musicale. E funziuneghja altru chè bè. Stendu à sente à Monduko Artistu, una creazione cù u gruppu bascu Kriolinak, quasi quasi vi pare esse Maximus prontu à affruntà e legione rumane, per via di a forza di a meludia è a putenza di e voce. 

« I belli ghjorni » hè un'opera evuluendu trà parechji mondi. Sì L'Abbrivu ùn hà micca lasciatu corre e so influenze d'America suttana, sò più discrete. Si ritrova duie riprese: un classicu messicanu Maria Chuchena in u stile Trompetas di Mariachi è A l'aventura. U gruppu sona dinù pè a prima volta u pop rock cù u titulu T'aspettu, assestatu da Ange Torre, anzianu membru di i Varans è A l'andà, sicuramente a canzona a più calibrata di u dischettu. Si vede dinù l'influenza russia cù Utopia, affaccata nant'à a scena corsa cù i Chjami Aghjalesi.   

Cum'è l'altri dischetti di u gruppu, ancu quessu hè un'aventura cullettiva, cù Christophe Mac Daniel, Freddy Olmeta pè e chitarre, a trumbetta di Dumè Ferrari è Elena Danelian à u viulinu. A magnifica voce dolce di Diana-Eva Teillaud-Muraccioli nant'à a ballata languida Ghjustu tù. Avemu dinù pè a prima volta l'edizione di a canzona Esistenza di l'annu 2015 è chì a canzona hà avutu successu nant'à Internet.