E cronache di Petru Mari
2017-09-05 15:01:06

18 Fujiyama Southampton, Northampton

 Quandu unu di Southampton incontra à unu altru di Northampton, ùn si capiscenu. Ghjè cum’è u pesciu chi’ parla à l’acellu.

Un si ponu capi’: e moglie di Northampton anu l’accentu d’Oxford (a varietà rurale). Quelle di Southampton so’ piuttostu Sussex.

Si spieca.

In Southampton ci so’ l’usci di i paradisi trupicali, aperti da donne incù i denti al’ di fora.

Northampton hà chjosu i soi, l’usci è i Northamptuninchi si morenu secchi secchi à u pede di u carminu.

In Southampton ci hè u mare, i battelli, e donne chi’ mastucanu i scingomi, l’omi in tee shirt chi’ fumanu à e terrazze di i caffè.

E i mazzerdi.

Mazzerdi à buzeffu ch’ùn aspettanu chè una cosa sola: zirbassi à banchi sani per diventà brunch, in e reti di l’omi in tee shirt bianchi chi’ l’accoglienu in i curnetti di patate.

In Southampton i fish and chips so’ in festa,

In Northampton si ne vanu tutti in cavuli.

In Southampton, si’ chi’ si ride.

Ma in Northampton, inno’.

Facenu u musu. Northampton hè una pianura di cavuli, senza musica, senza mare è dunque senza fishes and chips.

In Southampton stanu à sente musica nant’à giradischi di l’anni sessanta. Quarantatrè giri di twist è di rock primitivu.

Northampton nè balla, nè canta.

Da anni è anni cercanu i Beatles è ùn li trovanu. Ma i Beatles so’ di Liverpool, micca di Northampton. Un la volenu capi’.

In Northampton anu a suppa triste è a moglia briaca. Beie per scappà da issu locu accampatu da e vaccine, i porci, e cipolle.

Northampton hè tutta nebbia. Veste e piane di malincunia sin’à pruvà d’impiccassi à e forche d’arburi chi’ per furtuna ùn anu.

In Southampton invece facenu i figlioli, i fasgioli, i tiani di muntone incù a biera, castelli in Spagna è viaghji nant’à u Yang Tse Kiang, da duve parechji ùn vulteranu più. 

Quand’elli si incontranu trà Southamptnunacci è Northamptunesi, ùn si dicenu nunda.

O allora si menanu pugni in tupezzu.

Un modu di fà venutu, da a prima ghjacciazione di a terra, cum’è Donald Trump, l’umanu cavernaculu, chi’ quant’è oghje, ùn era ancu finitu finitu.

Un si pudianu nè incuntrà nè cuntrassi.

In Southampton ridenu cù una bocca piena di plum pudding appiccicatu à i denti d’un cervellu meridiunale.

In Northampton so’ sdentati.

Un ridenu micca,

Sbondanu

Sbondanu a tristezza di u so paese plattu.