Via Stella : 10 anni
2017-09-12 14:54:24



Luni l'11 di settembre, ci hè stata una cunferenza di rientrata, presidata da Marc Degli Esposti, direttore di l'antenne è di i prugrammi à Via Stella. Hà annunziatu chì, u 29 di settembre di u 2017, u canale festighjerà i so 10 anni. Hà cunfirmatu dinù chì l'ogettivu di a rientrata hè ancu di più à prò di a vicinanza. Per quessa, seranu presentati novi talenti, nove storie, passione è tuttu ciò chì ghjè in leia cù u Mediterraniu. Certe emissione parleranu ogni tantu d'altri lochi chè a Corsica, altre feranu scopre e grande capitale di u Mediterraniu è altri sugetti nant'à stu mare.

L'emissione medicale è di Ghjustizia purghjeranu e so nuvità è a cultura ùn serà sminticata, cù finzione, spettaculi vivi, è altri prugrammi varii pè amparà, capì è scopre. Cù l'emissione Inseme, si tramuteranu più spessu, seranu in direttu pè parlà di l'evenimenti, in u centru, in e cumune...  A lingua corsa serà ancu di più aduprata. Infine, l'orientazione maiò, pè ghjennaghju 2018, hè d'avè di più finzione à l’antenna, in particulare quelle rializate in Corsica. Cusì, di settembre 2018, ci serà una seria televisiva cù 40 episodii di 20 minuti. 

Venneri u 29 di settembre : Ghjurnata speciale d'anniversariu

Da Calvi à Bunifaziu, Aiacciu è Bastia, da l'edizione d’infurmazione à e vostre emissione d'ogni ghjornu (cù emissione lucale in sfarenti rughjoni à 10 ore menu un quartu è 4 ore è mezu, Manghjà Inseme, Prima Inseme, Sapientoni & Pendant le 20h), tutte e squadre di ViaStella v'invitanu à festighjà l’anniversariu di u vostru canale. Ci serà dinù una serata speziale à 9 ore menu 25 pè compie l'evenimentu.
A u prugramma : ricordi, musica, testimunianze è avvene di Via Stella...
In u locu magnificu di u Lazaret Ollandini, numerosi invitati parleranu di a nascita di u canale, di ciò ch'ellu riprisenta pè i Corsi è di l'avvene di a televisiò in Corsica.
A serata, presentata da Thomas Bronzini, serà ritmata da a musica "nustrale" cù in particulare i gruppi A Filetta, Incantesimu, chì hà participatu à l'emissione "The Voice", Diana Saliceti è Doria Ousset. Ma ancu Bertrand Cervera, primu viulunistu solo di l’orchestru naziunale di Francia, Pierre Gambini, canterinu è cumpunidore (in particulare di a musica di a seria Mafiosa).