E cronache di Petru Mari
2017-10-10 10:19:15

U ministru plenipotentiaire

A sapete ciò ch‘eo vulerebbi, eo ?

Inno’, ùn la pudete sapè.

Vistu chi’ Macron cannuchjuleghja e cacate di i so ministri, l’aghju dettu ch’ellu li ci vulia un ministru plenipotentiaire.

E quessu seria eo, u solu à pudè scunfini’ issa missione dilicata.

Ministru plenipotentiaire, ghjè unu di i sogni di a mio vita.

Aghju decisu di dì dece volti issa parulla in dui minuti.

Ministru plenipotentiaire. Ministru plenipotentiaire …

In issu onore tuttu mi cunvince. Inclusu propiu u titulu.

Issa funzione pare fatta à posta per mè.

A l’aghju detta à u Presidente Macaron.

Ministru plenipotentiaire. Ministru plenipotentiaire …

Ma Ministru sinistru di chì guvernu?

Mi n’enfuttu.

Un Ministru plenipotentiaire ùn travaglia per un guvernu, ma à prò soiu.

L’impurtante per ellu, ghjè u piacè ch’ellu piglia à esse ciò ch’ellu hè.

L’impurtante per un Ministru Plenipotentiaire ghjè u piacè ch’ellu piglia à cumbinà ciò ch’ellu cumbina.

Vale à di’, nunda.

 

Ministru plenipotentiaire.Ministru plenipotentiaire …

U titulu stessu hè spacificatu.

In plenipotentiaire, ci hè «pleni ». Vole dì chì s’empie. Un Ministru Plenipotentiaire, si techja. A so prima attività, hè di sbaffà è di unghje. Ete digià vistu manghjà un ministru plenipotentiaire ?

Face paura.

Certe tichjine...

Cuntinuemu à scurticà u titulu. « Potentiaire » : chì putenza in issa espressione ! Potentiaire, intende ch’omu ùn hè solu putente, ma ancu creatore di putenza. Passendu, vi facciu rimarcà chì in potentiaire, si sente cum’un’ odore di « potence ». Allora un ministru plenipotentiaire hè un birbantellu ch’ùn si face rimarcà.

Ma finisce appiccatu à e forche.

 

Ministru plenipotentiaire.Ministru plenipotentiaire …

Avà, s’omu si ficca più à spellà u discorsu, in plenipotentiaire ci hè ancu, piatta piatta «  a pota ».

Ete capitu? Ùn hè? Potentiaire, pota.

Ma in quessa, u ministru plenipotentiaire ch’eo seraghju ùn ci si intende.

Gode solu incù e lasagne.

Certe lasagnate…

 

M’avvecu d’una cosa: i candidati à issa funzione di ministru plenipotentiaire site parechji.

Hè sigura, ete capitu u so veru regnu.

Micca scemi…

 

Ma Ministru Plenipotentiaire ùn ci n’hè chè unu.

Sò eo.

A l’aghju detta à Macaron.