E cronache di Petru Mari
2017-10-11 11:21:40

E

E cronache di Petru Mari

Fujiyama Corsicaland

Quantu n’emu fattu viaghji….

Ricurdatevi, i v’aghju conti. Bujumburà, u Tanganikà in cerca di Livingstone, a Mungulia e i so Yack, U Buthan pupulatu di Buthane, a gara di Timphù incù i so treni in legnu è i vulcani d’Islanda.

L’Eyjafjöll, ghjè u vulcanu chi’ fece cacà l’Europa sana, Senza cuntà u Grimsvötn, arrabiatu, chi’ scrachja fumicaglie tantu chi’ pianu pianu amantanu u nostru cuntinente. Cunsequenze : sole ghjalatu è aviò inchjudati nantu à e piste.

Sò sprupositi a capacità d’un isulottu à rompe e palle à un cuntinente sanu. « Les volcans ça ose tout »,, disse quellu. Ghjustamente hè propiu in quessa ch’omu i ricunnosce.

Pensemuci à l’esempiu islandese, noi Corsi, chi’ in quella di rompe i santissimi à i Cristani ci capimu à bastanza.

Hè vera chì l’Islandesi anu i vulcani, noi no’. Un emu finitu incù elli, andate puru.

Centutrenta, sò i vulcani in l’isula, tutti furibondi, pronti à scuppà è rende in l’atmusfera i veleni chì l’empienu a panza.

 .

Quantu n’emu fattu viaghji inseme. Hè ancu vera chi’ simu quì per sortene un pocu più intelligenti, micca quant’è Gilles, no’…Ghjustu una cria di più sennuti.

U Fujiyamà (U Fujiyamà ghjè u nome di ssa cronaca si vo vi ne site scurdati) face cunnosce u mondu à l’auditori tantu rurali chè cultivati.

Postu ch’ella vi piace, eccu i nomi di i prussimi vulcani islandesi i più impistati : u Vatnajökull, u Hvannadalshnukur, u Langjökull, u Hofsjökull, u Myrdalsjökull è u Katla Ma ellu hè un imigratu mi pare.

.

Oghje, voltu da a Sumalia, duve sò andatu per pruvà di smagrì.

A Sumalia, incù u so emblema naziunale, u fisculu mariò.

I Sumaliani, a sapete, sò magri magri. Incù e surelle Vasetti passavamu davanti à l’ospidale di Hargeisa. L’usciu era chjosu. Ci era un fogliu scrittu puntarulatu nantu : « In casu ch’ellu ùn ci sia nimu, fate passà u malatu sottu à l’usciu ».

ASumalia, ghjè a Mecca di i muvimenti identitarii naziunalo’ -indipendantisti. Issu paese felice, hè cumpostu di tribbù à a fame ch’ùn si ponu pate in pittura. Volenu tutte l’autonumia o l’indipendenza, senza sapè propiu a differenza. U fondu puliticu di u naziunalismu frantumatu di e tribbù sumaliane si pò sintetizà in a celebre frase di u cugnatu di Lumumbà : « andate tutti à cacà ».

Un zinzicu di geopulitica microregiunale.

A u nordu ci hè a regione di u Somaliland. Sò stati i primi à staccassi dichjarendusi indipendenti. À fiancu, più à levante, avemu u rughjone di u Puntland. Cum’ella a lascia intende u nome, ghjè chjucu chjucu u Puntland. Vint’anni fà i capitribbù Puntlandesi si sò detti autonomi o indipendentisti, segondu l’estru di u ghjornu. Quand’elli l’anu dumandatu perchè, anu rispostu : « è chì v’ariguarda ? ».

À tocca tocca incù u Puntland, avete u Galmudug. « Ancu noi, ancu noi » anu mughjatu e tribbù di u locu. È si so messe à fà ognuna ciò ch’ella vulia dendu calci in corpu à ch’ùn capia è chjamendu issu modu d’urganisazione « totocalcio ». À punente, truvate u Jubaland. I Jubalandinchi, più cultivati, anu spiegatu : « vulemu esse autonomi chì noi simu neri, quandu l’altri sò neri neri ».  

Infine, per cumplicà tuttu, ci hè u casu di u Maakhir, trà u Somaliland è u Puntland, di i quale parlavamu prima. U Maakhir, ghjè una pianura desertica grande cum’è a Piazza di u Diamante in Aiacciu. Ci soffia un ventu callu. Ùn nasce un filu d’erba. U Somaliland è u Puntland, si cuntrastanu chì rivendicheghjanu ognunu issu locu. In risposta, i quattru pastori chì sò tuttu tuttu sanu sanu u populu Maakhirese, anu rimbliccatu : «  postu ch’ella hè cusì, dichjaremu ancu noi a nostra autonumia ».

Bonu, smagritu ùn aghju tantu smagritu, à colpi di fisculi mariò.

E po tutti issi penseri…

Ma aghju amparatu.

Ma avete amparatu.

Ghjè tuttu benefiziu pè u Corsicaland.