E cronache di Petru Mari
2017-10-12 09:25:44

 

Fujiyama

Viva la muerte !

 

Aghju rimarcatu una cosa. Ind’è a vita, capita sempre ch’omu passe per un baullu.

Unu ch’hè trasparente.

Tandu, nimu vi stà à sente.

Da ch’ellu vi piglia u bisognu di di’ qualcosa, v’attaccanu subbitu lite per favvi stà zittu. Ciò chè vo dite si ne casca in terra cum’una cuscogliula, senza u minimu rimore, in l’assenza di u minimu sonu.

Per dilla franca, di voi si ne impippanu. Mancu. Un esisite micca.

È poi, eccu chì un ghjornu cascate malatu. Ma attenti, micca un cataru, una malatia di lussu, di quelle chì mettenu u restu di a vostra vita, assai di più à l’inforse chè una pulendata incù u figatellu sinteticu o a solita incertezza nantu à u tempu chì vi ferma à campà.

Di colpu, site qualchissia.

Allora, v’avviete d’un cambiamentu : per meraviglia, i vostri detti chi’ nisunu sentia, diventanu interessanti. Un site più quella croce ch’omu vole tace. Purtantu ùn anu cambiatu i vostri parè, ma sò ascultati, acquistanu valore, chì, qual’hè chì sà sì u tempu ùn v’hà da mancà.

In a morte, acquistate l’impurtanze chi’ vi mancava.

Finalmente, accade chè vo vi morghete.

Tandu, voi u rompi stacche, entrate in gloria. Voi, chì annervavete, dicendu cosi chì pigliavanu di ribattu l’opinione zitta di a magiurità muta. E vostre parulle senza anima, zuccate per meraviglia di tagliolu in a petra ferrigna, diventanu eterne.

È mutate à statutu : di rompi cuglioni vivu, passate à eroe mortu, per finisce in l’arca d’una dimentichezza chi’ apparineghja à tutti.

Certi so’ persuasi di a permenenza di u spiritu. Dicenu chi’ l’eternu serebbi quessa.

Ramentemu un fattu d’una volta, per quelli ch’anu l’età di ricurdassine. Per l’altri u l’ampargu

Valery Giscard d’Estaing, lu corciu, attacco’ lite à u merre di u paese d’Authon, in u Loir et Cher. Quand’ella sunerà l’ora, ùn vulia esse interratu in u campu santu pubblicu, ma in u so giardinu di famiglia. In fatti, ùn hè statu ellu ma a moglia à circà rogna. Anne-Aymone, ricuso’ chì u catavere di u maritu, sempre vivu, frequente a pupulaia digià morta è interrata in cimiteriu cumunale.

Ma issa Anne-Aymone, chi’ ne dite ?

Sempre à mezu à mette a puzza di carne fracica !..

Incù a so faccetta di Santa Madonna addulurata.

Issa pelle, si stippava cù falcina in manu à u corciu di maritu, frustu ma sempre vivu. Hè vera chì, mumificatu era quasi digià.

Ma quantunque, lascialu more prima d’interrallu, lascialu more, lascialu.

In campu santu publicu.

Almenu chì, per vultà à u discorsu di prima, Anne-Aymone ùn voglia fà a dimustrazione à i « musgik » di u Loir et Cher, chi’ u tintu Valery hè più grande mortu chè vivu.

Serà propiu quessa a permanenza di u spiritacciu ?