E cronache di Petru Mari
2017-10-25 11:44:26

U rillogiu è u tempu

Ùn sò sè vo l’avete rimarcata, in a vita ci hè duie categurie di persone : quelli chì anu u rillogiu è quelli chì anu u tempu.

Chì abbianu i dui inseme ùn ci n’hè.

Forse Gilles…

Quelli chì anu u rillogiu, ùn anu u tempu. È quelli chì anu u tempu ùn anu bisognu di rillogiu.

In pulitica si vede in l’avvicinà di u tempu d’elezzioni.

Ci hè sempre dui catecurie à cumpete.

Quelli chì anu u rillogiu anu paura di mancà di tempu chi’ u tempu li stringhje.

Quelli chì so’ à l’oziu invece, beati elli : si coglienu à u tempu è u si piglianu cum’un cavallu mansu.

Fidighjate bè, si ricunnoscenu i penserosi di u rillogiu è i spenserati di u tempu.

Iè ma so’ belli boni issi discorsi, resta à sapè chi’ strada piglieremu:

U rillogiu o u tempu ?

Cumu facciu eo ? Cumu faci tù ?

È chì ne so’.

Chì sega di duvessi esprime, quand’omu ùn hà tante cose à dì.

Avà, sè vo vulete ch’eo v’abbuchje infrasate sentenziose di supermercatu, sapete issi detti pronti è lesti. I pudete aduprà subbitu, ùn ete sforzi à fà. Vi puderia dì, per u fattu, chì u patrone ùn hè nè quellu chì hà u tempu nè quellu chì hà u rillogiu, u patrone hè quellu chì si ne impippa.

Imbo’ ch’eo u capiscu bè u mondu.

In a vita ci hè duie categurie di persone : quelli chì anu un gattu nurmale è quelli chì anu un gattu mungolicu. Eo sò in a segonda categuria. U mo gattu i bisogni i face sempre accantu à a so cascia. Gratta chi’ mi ti gratta, u sulaghju, i vetri, i pedi di i futtogli. Gratta tuttu. Dura cinque minuti. Dopu si mette in pusizione in a so cascia è ploppi ! Casca à cantu. L’emu ingrandatu a cascia, ma era listessa, lampava u so stercu à cantu cum’è s’ellu a fesse à posta.

Allora l’emu pigliatu una cascia tamanta à un terrenu di pallò.

L’hà guardata. Hà grattatu incù a so zampetta, è gratta chi’ mi ti gratta, u sulaghju, i vetri, i pedi di i futtogli, hà grattatu u mezu mondu. Hà duratu cinque minuti. Dopu s’hè messu in pusizione in a so cascia tamanta à un terrenu di pallò, è ploppi ! Hè cascatu à cantu.

Ghjè tandu ch’aghju capitu chì ancu pè i gatti, ci sò quelli ch’anu u rillogiu è quelli ch’anu u tempu.

E simu parechji cusi’.