Cronache di Petru Mari
2017-11-15 11:52:37

Scarsa neve

Ghjè una cosa scarsa,

a neve marina d’una volta

Sognu à isse matine inguernali tantu aspettate quandu a neve s’invita in batticcia à l’ora di u caffè.

I tetti di i vechji casali di l’antica Bastia, troppu abituati à spechjassi in u culor’ marinu so’ ingrisgiati in un Mediterraniu annivulatu.

Issi tetti, cambiarini troppu, so’ cuperti d’una stunente dulcezza bianca. Si vestenu d’un miraculu.

Eccu chi’ piglia valore u calore casanu, u caffè à latte, u tizzone chì scuppitteghja, puru si’ tizzoni ùn ci n’hè più in i carmini urbani, sustituiti da i vasi di pianti verdi.

Ma si sunnieghja, allora…

Sogni d’un tempu incantatu, di l’efemera teneressa di a neve chi’ svulachjeghja, prutagunista principale d’una scenugrafia chi’ toglie à u Mare Terraniu a so abituale parte di a maestà.

Ma in isse stonde scelte chi’ averanu u miraculu tantu aspettatu, ci vole à impuntassi per frenà u fatale scorre di l’ore felici. 

Chi’ si po’ fà, s’ellu ùn hè di lascià u versu di l’acque ghjunghje à e foci.

Scarsa neve.

A l’isciuta di a sala di bagnu, i tetti scandilleghjanu digià di grundaghje malinconiche. A dulcezza bianca si strughje, si inciotta in e piove poi finisce in acqua di cunduttu, è, dopu à avè lavatu i tighjati impuzzichiti, si rivuccata in u Mediterraniu, per avvelenallu un suppulu di più.

Quant’elle duranu pocu, è cum’elle si compienu in miseria, isse stonde felici.

Ghjè forse per ciò chì u so valore hè altu. Diamanti chì u fà di l’anni ci cappia à l’ispensata, troppu  pocu.

Troppu pocu.

Chì misteru…

Solu i maturaghjoli sanu quand’ellu ci vole à vultà in i paradisi di a zitellina…