Cronache di Petru Mari
2018-02-07 11:24:33

So’ un pueta facultativu solu sulettu à l’apperitivu.

Ne aghju purtantu cose da infrasà,

Versi diversi.

Puderebbi di' a mea, ma mi taciu,

O ùn aghju voglia.

Quelli chi’ dicenu, ùn hè un gran’ chè.

So’ strufate malate,

So’ pochi è pocu astuti,

Ma ùn so’ muti.

Invece chi’ eo,

So’ un pueta ch’ùn ci arriva

Chi’ aghju una vita facultativa.

Ùn so’ nisunu, nimu, ùn aghju impurtenza.

Mi morgu in l'indiferenza.

 

L’averebbi po l’agettivi

Pronti à esse sbandierati.

Ma ùn sortenu, i mi tengu per mè.

Aspettu quella stonda chi’ mi ferà rè.

Eo u pueta malfatatu.

Campu arimbatu à i scogli

Chi’ mi facenu da futtogli.

 

So’ un pueta facultativu,

Avà a m’aghju capita.

Troppu tardi è senza ossessioni,

Un aghju più tante pretensioni.

Oghje a mio casa hè La Timone,

Atturniatu di stroppii è spugliati,

Ghjente in camisgi bianchi,

Infirmiere, medichi o qualvogliasia,

So’ diventatu qualchissia.