Cronache di Petru Mari
2018-03-06 11:38:15

Ti cercu è ùn ti trovu

Sè tù sapesse cum’è tù mi manchi,

Quandu

Chjosu in camera principia a notte

E ùn ti trovu.

Senza tè so’ un piulu

Nudu è crudu.

Aghju u fretu

Senza tè e notti d’inguernu so’ dure troppu.

Aghju bisognu di tè

Ti cercu è ùn ti trovu.

Crescenu i trimuleghji

Aghju u fretu.

Un ci si’, ùn ci si’, ma induve si’ ?

Ti vogliu nantu à a mio pelle

Vogliu sente u to calore nantu à a mio pelle

Risente issu strufinime

Casanu,

Domesticu,

Intimu

Nant’à u mio corpu nudu.

So’ tutte calorie chi’ si ficcanu in i pori di a pelle, spannati da u sullevu.

D’inguernu, si’ a mio riserva di calore

D’estate nò.

A dittila franca, d’estate s’eo ùn ti trovu ùn face nunda.

D’altronde, d’estate ùn ti cercu

D’estate, statti puru induv’è tù si’

Ti tengu ti tengu forte forte

Ma d’inguernu

Per chè tù mi scalle.

D’estate mi scallu da per mè.

Ma ùn simu d’estate

Simu d’inguernu è a notte principia,

Ti cercu è ùn ti trovu,

U mo pisgiamà.

Chi’ seca…