Cronache di Petru Mari
2018-03-06 11:57:43

Custruisce i nostri sogni nantu a realità isulana. Hè quessu er’bellu. L’affare hè impietosu. Dui seculi è mezu di clanismu cecu è di sottumissioni accettate, anu fattu opera di distruzzione.

Quand’omu sentia i discorsi pulitichi di tandu, spessu s’assumigliavanu à discorsi di dopu pranzu.

Mancu i sogni tenianu ritti. D’altronde ùn avianu.

Si sentianu i rimproveri nant’à l’inesistenza di a Corsica in una seria di campi ecunomichi o culturali, nant’à l’assenza di l’isula in ùn si sà quante strutture eurupee o di cuuperazione. Appughjendu nantu à u fattu chì a Sardegna, a Sicilia, a Catalogna o a Tuscana, elle ci sò in l’aministrazione Eurupea, per difende u soiu. Rimbeccu ancu à prupositu di a nostra incapacità à parà a desertificazione di l’internu è tante altre cose ch’ùn vale a pena di cuntinuanne u recapitu.

Ma l’affari pare ch’elli cambiinu. Sò ghjunti à u guvernu territuriale quelli chì lamponu fora e volpi argentate o micca è chi’ volenu fà o rifà a Corsica. Ci hè un datu chè no duvemu tene sempre impressu, sì, propiu l’avvene da fà esiste. I nostri piani, e nostre pruposte, i nostri prugetti è ancu i nostri sogni, si devenu aggradicà in u veru. A Corsica hà trè centu mile abitanti, strutturati in una piramide di l’età à l’aritrosa, vale à dì ch’ellu ci hè più vechji chè giovani, puru sì quessa hè curetta da u scalu di pupulazioni isciute da l’imigrazione o d’altrò. Ma l’imigrati per avà sò scartati da e mosse di u Populu Corsu. Colpa nostra, colpa soia, colpo à i comunautarismi ? Ghjè una complessità chè no duvemu accettà.

Risultatu, u fattu stà chì trà u troppu di pupulazione anziana cumplicatu da issa spezie d’apartheid trà i Corsi storichi è quelli ghjunghjiticci, a nostra capacità d’iniziativa hè ridutta assai. Ridutta à qualchì millaia di donne è d’omi. Una manata. Ridutta a nostra capacità d’iniziativa in a vita pulitica, in l’ecunumia, in l’agricultura, in a cooperazione internaziunale.

Stunati ùn pudemu esse, d’ùn piglià postu à paru di e regioni citate prima, puru si a Catalogna hè in l’imbrogli. Custì l’abitanti si contanu in millioni. Ponu esse presenti. Noi in Corsica, simu sottu à a « massa critica », riguardu à a pupulazione.  

Emu bisognu di sangue novu, ma issu sangue novu chì si chjode in a so citatella culturale. È so pochi quelli chì ne so’ cuscenti.

Purtantu, ùn ci impetta micca di sunnià, quand’omu pensa à l’avvene. Ancu di più : hè urgente di sunnià.

Furtuna, u sognu hè principiatu malgradu l’azizume ch’ellu puderia fà nasce.