Cronache di Petru Mari
2018-03-13 11:54:21

Esse o ùn esse un Taz. Ghjè una di isse dumande chì fondanu u nostru mondu chì capiciutteghja. Hè fatta da un amicu à l’oziu, à ora apperitiva.

Hà dettu chì mai ùn seria capace di fà una cronaca nant’à i Taz.

Vi sentu diciulà, ascultadori di l’Alta Rocca o di u Niolu prufondu : « ci ne infuttimu, ci ne infuttimu tantu chì ghjè un sprupositu. In più, un Taz, un Taz, un Taz, ma cosa torna serà issa issa seca di nuvità chì ci n’hè una à ghjornu, ch’ùn ci si capisce più nunda, chì sè v’andate troppu di furia à inventà, vale à dì à move u ventu, noi i minenfuttisti vestuti di minenfuttu, ùn vi lasceremu fà.

È in più eri, a mio moglia in u Cruzini, pianghjia senza sapè perchè. Allora capite bè chì incù i vostri Taz, entritemi puru induv’elle fiscanu e noci.

Sò quessi i batalimi paisani.

Và bè.

Un Taz, per une pochi, ghjè un cyber-locu libertariu tempurariu è intempurale, duv’elle si sparghjenu utupie è cyber-insurezzioni chì sprichjanu, smarriscenu è rinascenu in altrò, fucaci è fughjasche, cum’è caravane di a pensata in u desertu urbanu ch’hà persu u rigiru.

Ùn ci ete capitu nunda, ma ùn vi ne fate, ghjè Corsu d’oghje.

Per d’altri, u Taz, ghjè u cusidettu Diavule di Tasmania, l’ultimu animale sarcofile di a pianeta. « Sarcofile », ùn vole dì ch’ellu tene caru à Sarkozy, serebbi u solu. Innò, sarcofile, intende ch’ellu si manghja i cadaveri. Ghjè neru, tondulu incù una bocca tamanta, gattivu cum’è a pesta è chjirla cum’un pazzu.

U cunniscite,

Di Taz, n’anu fattu unu in America, un presidente, persunagiu di figurette animate. Ancu in Francia, un presidente di a repubblica, ma macrofile incù una bocca chì fraga.

Per noi, ciò chì ci primureghja, ghjè chì i Taz, sò un populu. Campanu in Siberia, nant’à un territoriu une volta è mezu tamantu à a Francia. Pianure infinite. Soffia senza calà mai u ventu chì cotra i mocci nant’à i mustacci. I Taz, campanu, d’istatina, in imice di u fiume Taz, à mez’e padule è muschini Un fiume chì corre in a sottu-prefettura di Iamalò-Nenezia. L’affare hè chì in a sottu prefettura di Iamalò-Nenezia campanu i Nenezi, ghjè un antru populu. Ma dinù d’altri, ci stanu custindi: i Tatari, l’Azeri, i Baskiri, e Cummisse è tanti chì sò quant’è i culombi, numerosi, grassi è tondi. Adopranu l’apriscatule elettrichi è anu panze pendiconi.

I Taz, elli, sò magri in canna è ùn sò chè trè. Ghjè un populu chì campichjeghja in l’esiguità è in l’indifferenza generale. In più a so lingua s’hà da more è in e padule deserte di e sponde di u fiume, d i Taziani, issu populu senza memoria, ùn ne firmerà mancu u ricordu.

Ghjè per divvi, o amichi microregiunali, chì, sè no ci mettimu à trattà di sugetti simili, i Taz, simu male.

Ci sò affari più gravi chè e lacrime di a e moglie Cruzinesi, no?