Cronache di Petru Mari
2018-03-14 12:01:40

A viulenza in corpu

A sapia eo. Ùn ci vulia micca à parte in Tuscana. Voltu è mi trovu un mondu scempiatu.

I giurnalisti, puru in ritirata, ùn duverebbinu mai parte in vacanze. Sbarcu è trovu u mondu tuttu rottu. In Siria ci hè a guerra civile trà quelli di Assad, i Russi, l’Americani, i Turchi è i Francesi incù i so aerei in legnu.

In Corsica, volta a lite di i storichi è di l’abbituali di Canta u Populu Corsu chi’ piglia paesi. Perchè chi’ si ne torna à parlà ? Forse per scurdassi di a superbia di Macron chi’ ci hà inghjuliati ?

In tantu in a nostra isulella, u mondu si sparte trà i partigiani di Canta u Popupulu Corsu è l’altri di Canta di u 73.

Spergu ch’elli ùn s’anu da piglià à murtaiate.

In fatti, ghjè a classica lite trà generazioni : i giovani contru à i vechji.

Ma attenti, ci n’hè une pochi chi’ sò ancu più vechji chè quelli chi’ sò digià vechji. Si puderianu ancu discità : ghjè Canta di u 173, incù Vincent Orsini è i so amichi di u Machjone. Pensenduci, finalmente, s’omu mette inseme Canta u Populu Corsu, Canta di u 73 è Canta di u 173, cosa risulta ? U Populu Corsu sanu sanu, in a so varietà, in a so scimità, armata di l’ombra cumpresa, puru chi’ ombra ùn ci n’hè più, è ghjè megliu cusì.

Chi’ pò fà. Ùn simu ciò chè no simu? Scunfinimuci cusì. Trà i troppu giovani, i vechji è i scianchi ci emu da difende listessu contru à a gattiva sorte è l’odiu cuntinentale.

Noi tenimu caru à tutti, avemu tempu, fede in l’avvene è Fabbiana Giovannini.

Ci pudemu crede!

U ghjornu venerà quandu u Francese, custipatu ùn serà più. A capite avà perch’ella hè cumplicata a vita di i giurnalisti sviliti è ritirati di tutte isse cusuccie impurtanti chi’ serianu u sale di a vita.

E pressioni ùn ci sottumettenu più. E pressioni. Parlu di e biere benintesu. E biere pressioni. Allora emu bisognu d’una vita privata forte è presente assai, chì ci aiuti à tene. Ghjè perciò chì eri sera sò andatu à fà « un diner presque imparfait » ind’è Marianghjula a mo parente.

Marianghjula di Padulella, alò.

Vò à fà cena ind’è ella à ogni volta ch’eo mi vogliu scurdà ch’eo aghju una panza. Avia fattu i storzapreti, ma senza prete. Face ch’ùn ci era più tante cosi da sturzà.

A dicu per l’Aiaccini chì ùn la sanu : i storzapreti sò pulpette fatte incù bietule, brocciu è poi infurnulate. Accumpagnanu un tianu di vitella corsa o cignale, à a stretta.

Ma Marianghjula, bietule ùn avia, hà messu i spinaci in cunserva. U brocciu, ùn vulia andà à buscallu, ci hà ficcatu u Boursin. Pè u restu ùn sò cum’elle s’hè sbrugliata, ma le diner presque imparfait era peghju chè imparfait. Indigestu, quand’è un discorsu di issu disgraziatu di Chevenement.

Ùn ci vulia parte in vacanze, ùn ci vulia. A sapia eo.

Avà mì, per turnà à entre in sumiglia incù una attualità chi’ mi prudisce, aghju bisognu d’avè u capu à u frescu. In più, da poi ch’elli ci anu dettu chì noi Corsi avemu a viulenza in corpu, ùn steranu tantu à mandacci u segondu REP.

Marianghjula chè tù scia ceca.

I to storzapreti, tutta viulenza nustrale.