Cronache di Petru Mari
2018-03-21 11:34:54

Ùn la ti dicu micca…

Induvina da induv’eo ùn ti chjamu micca ?

Innò, ùn hè micca da l’Emiratu di u Catarru, pè issi paesi nurdinchi, duv’omu ùn và chè per crepà di fretu.

Allora, induvina da induv’eo ùn ti chjamu micca ?

Innò, ùn hè mancu da isse sciappittane suddiste, duv’elle sò più numerose « les femmes battues » chè « les femmes batonnières ».

Ùn ti chjamu micca da a Tuscana, per ditti ch’eo sò in vacanze in u core di u Chianti Classico. È ch’eo sò andatu in discuteca. À pruvà di strufinà. Ùn ti dicu dunque micca chì mi s’hè avvicinata una Tuscanella, ch’ùn a ti possu mancu tantu ritrattà : era cum’è isciuta d’una unione trà a surella di Grossu Minutu è un caratellu.

Mi guarda è mi face, languida :

-      A sai chì tù ai una certa classa tù. Sì bellu cum’è tippu, tù. … (li vulia risponde « quale, eo ? », ma hè ancu vera ch‘avia messu u mio custume di a dumenica, allora….

In fatti, ùn sapia cosa rispondeli, era emuziunatu. Aghju cappiatu a prima scimità chì m’hè venuta:

-       O madama, mi dispiace d’ùn pudè dì listessu di voi….

S’hè stata zitta una stundarella, è, sempre fidighjendumi incù una risetta stupida chi’ s’averia meritatu un decalitru di lipposuchjata, mi risponde :

-       Fà cum’è mè, conta una bugia…

Infine chì, dopu à una corta chjachjerata mi ne sò andatu.

L’aghju ritrova l’indumane matina. Eo pigliava u caffè tranquillu, in piazza, à u sole. Ùn hè venuta à pusammisi vicinu, ùn hè venuta ? Mi sò dettu, ma chì mi circherà issa tambuzzona ?

Venia propiu di calassi quandu (ci eranu i travagli in piazza), un rullò cumpressore hà inciaccatu à unu chì passava. Tamanta frittata… Un agente s’hè messu à chjirlà incù a ghjente, à corre affannatu, gridava à tutte e donne ch’ellu truvava. Hè ghjuntu vicinu à a mo ghjuconda lipitinosa è li dumanda ansimendu :

-       Avete micca un maritu chjucu è grassu ?

-       Propiu sì, per disgrazia, face quella.

-       È bè, avà ghjè grande è magru, li dice l’agente singhjuzzendu.

A saetta di u dolu ùn hè stata tantu à alluntanacci.

Aghju sappiutu chì dui ghjorni dopu, a veduva era in gara di Firenze chì pigliava u trenu per andà à interrà u so corciu di maritu. Tondu è plattu cum’un nicciu, l’avia sucellatu dentru à un inviloppu. À l’impiecatu dumanda :

   -   Un bigliettu per Reggio, per piacè.   -   Reggio Emilia o Reggio Calabria ? Ella pensa une cria è risponde dupitosa :

-     Umbè, hè listessa, tantu venenu à pigliammi in gara…

Caru amicu, ùn ti chjamu micca da a Tuscana in u core di u Chianti Classico per ditti chì nicci ùn ne manghju mai più.