Cronache di Petru Mari
2018-03-29 10:28:19

E frasi storiche

« U cambiamentu hè l’unica custante ». Quale l’hà detta u primu issa frase putente ? Umbè... Eraclite mi pare. Un Grecu chì hà campatu in u prufondu di i tempi i più antichi quandu u barbeuq ùn esistia ancu. In a so forma attuale, vogliu intende. Perchè, arustì, arustianu tuttu ciò chì li cascava. Topi, galline, acelli, schiavi. Infine i schiavi sempliciotti chì pretendianu nant’à i piazzali di Curinta, ch’elle avianu una anima.

Face ride.

Hè curiosa issa moda di i Grechi. Tutti pretensiunuti, tremila è cinquecentu anni dopu a so apugea. Chè vo sgiate, i pochi chì sapianu scrive è ragiunà, vale à dì a manata chì pigliava à tutti l’altri à calci in corpu (schiavi, servi, donne), traversavanu u piazzale d’Anfipolis, in Macedonia Orientale, per andà sin’à u peristile di u senatu lucale à dì una frase storica, chì ribumberà di seculu in seculu sin’à oghje. Cridianu.

Eraclite, à nove ore di mane, s’hà chjappu a so tazzona di latte incù u pane intintu nentru - u caffè ùn si cunnicia ancu -, è hà leticatu a so moglia per amparalli. Per amparalli cosa, ùn la sapia, ma l’affare hà poca impurtanza. È ghjè partutu à fà e so faccende. Una volta in carrughju, s’hè dettu, «tè, lasciami andà à dì una frase storica ». D’un passu ch’avia i mezi di a so pretensione, hà varcatu u piazzale impavimentatu d’Argos, a celebre cità di u Peloponese, hà cullatu a scalinata di u tempiu di Gaia, a moglia di Uranos, mamma di Cronos, caccara di Zeus, di Hera, di Poseitone è di Hades. Innò, micca Hades di Luisa, Hades di Cronos è di Rhea, alò. Ghjuntu in cima, s’hè imbrancatu à mezu à u peristile, è, d’una voce chì trimulava da l’emuzione, s’hè messu à chjirlà a prima frase storica chì l’hè venuta : « U cambiamentu hè l’unica custante ». È si n’hè andatu à fassi un fruzzulu à a marina, chì ghjera un pocu luntanetta. Bella po hè bella a frase d’Eraclite. Ma hè svucerdata da a realità. Ci hè una cosa ch’ùn cambia micca : i povari si fermanu sempre i listessi, è sempre sottu à i signori successori d’Eraclite. Cum’è una volta, sò pigliati à colpi di schincu purcinu in capu, quellu chì coce arangiatu incù e fave, dentru à e so pignatte antiche, quant’è a so civiltà. I fasgioli ùn l’avianu ancu à scopre. In issi tempi, schincu incù e fave ùn ne paspavanu i disgraziati disoccupati è i stercaghji adurmintati nant’à e muragliette di u piazzale d’Argos. Tremila è cinquecentu anni fà, ghjera dicia cum’è oghje: nunda hè cambiatu, i scurnochjuli i pescanu sempre i listessi. L’Insè di l’epica, a dicia digià chì i Grechi, cum’è i Corsi d’oghje ghjornu, avianu i rivenuti i più bassi di tutti. Allora, sè vo infattate à Eraclide, à u Caffè di a Marina in Aiacciu, duv’ellu hà l’abbitutine d’andà à fà i so fruzzuli, diteli ch’ellu rifletti prima di parlà à a scimesca.« A stabbilità hè l’unica custante, in certi lochi », l’avia pussuta dì ancu cusì, chì ne dite?