Winterfall, un ghjocu video d'aventura in lingua corsa
2018-05-16 10:05:40

Fabien Mariani hà sviluppatu un ghjocu video chì a storia hè cuntata in lingua corsa, sottutitulata in inglese pè fà cunnosce a nostra lingua ind'u mondu sanu. U ghjocu hè pruduttu da Frédéric Antonpietri di u cullettivu d'artisti Corsica Sound. Fabrice Mariani pensa chì "u Corsu hè un linguaghju bellucciu, musicale è chì hè capace à dà una dimensione d’esutismu, di fantasticu, in leia cù a scuperta video di paisaghji isulani". Difatti, Winterfall ùn hè micca un ghjocu d'azzione cum'è quelli d'oghje. In più di a lingua, ciò chì preme hè dinù a scuperta di i paisaghji isulani.

Ghjovi u 31 di maghju, à 5 ore è mezu di sera, u ghjocu serà presentatu à u centru culturale L'Alboru, in Bastia, sala Ghjuvanteramu Rocchi, in u quadru di a festa di a lingua.