À passi minuti in puesia
2018-08-04 16:33:14

Patriziu Croce è Ghjiseppu-Antò Salviani anu publicatu una racolta chì prulungheghja a spusizione di pitture "À passi minuti" chì ornava a mediateca Barberine-Duriani di u centre culturale L’Alb’Oru in Bastia, di nuvembre 2017. Patriziu Croce, prufessore di corsu à u liceu di Montesoru, autore di numerose canzone di I Chjami Aghjalesi è Ghjiseppu-Antò Salviani, prufessore di lettere muderne in Montesoru, anu cuncoltu i so puemi in lingua corsa in parechji temi : l'universu, u tempu chì fughje, l'amore, a vita bastiaccia, a Corsica… 

In tuttu, una centinaia di puesie, affiurate da e so penne per dì à tempu u sbucinà di a vita per stu dumane, ma dinù i tempi scorsi è andati spressi longu à e spassighjate puetiche. Quelle chì si facenu à passi minuti. Da pudè andà pianu, ma sempre sanu. In stu libru, avemu dinù disegni è pitture chì illustranu i temi scelti da l'autori.