Natale Luciani, 15 anni fà
2018-12-04 15:10:37

15 anni fà, u 7 di dicembre di u 2003, si n’andava à 54 anni, Natale Luciani, musicante è parullaghju attalentatu, ch’hà fundatu u gruppu miticu “Canta u Populu Corsu è “A scola di cantu” chì esiste sempre oghje. Era dinù militente di u FLNC. Natale Luciani hè dunque una di e persunalità di a storia culturale è pulitica di a Corsica, da u Riacquistu à u principiu di u XXIu seculu.

Hè statu arrestatu d’aprile 1984 pè pusessu di splusivi è cundannatu à 7 anni di prigiò di maghju 85. Durante stu prucessu, rivindicava a so appartenenza à u FLNC. L’annu di a so arrestazione, un commando di l’organizazione clandestina hà pruvatu à fallu liberà durante l’operazione militare induve l’assassini di Guidu Orsoni eranu stati tombi. Di lugliu 85, cumparia à u tribunale di Liò pè l’affare di a prigiò d’Aiacciu, ma hè dichjaratu nucente.

In u 1988, imprigiunatu à a centrale di Saint Maur cù Pierre Albertini, anu da riesce à prutege u direttore durante una rivolta di prigiuneri. Liberatu in u 1989 grazia à una lege d’annistia, ùn era micca rimpiegatu in l’Educazione Naziunale ma à a direzzione regiunale di l’affari culturali induv’ellu travagliava sin’à a so morte. E divisione è dopu l’affruntamenti sanguinosi trà muvimenti naziunalisti anu stumacatu stu militante sinceru è idealistu chì ùn hà mai vulsutu u pudere. Era sempre un naziunalistu di core sprimendu a so sulidarità à i prigiuneri è e so famiglie durante serate di sustegnu. Dapoi tandu, limitava a so azzione à u militantismu culturale è à a trasmissione di a cultura corsa à e giovane generazione, in particulare cù a creazione di a scola di cantu da induve spuntava una nova generazione di canterini corsi.

Natale Luciani hà avutu un accidente murtale, a notte da u 7 à l’8 di dicembre di u 2003, quand’ellu vultava da a fiera di a castagna in Bucugnà. A Corsica perdia un omone puru, onestu è dirittu, ma a so memoria camperà sempre.