Campà, u novu dischettu di Christophe Mondoloni
2018-12-14 15:58:04

Hè esciutu u terzu dischettu di Christophe Mondoloni chì celebreghja l'amore, a famiglia, a rinascita è a fratellanza. U so titulu riassume u cuntenutu : a vita. Dice u canterinu : "Ùn ci hè nunda di più bellu chè a vita, malgradu i strazi chì tutt'ognunu deve pate". Christophe Mondoloni vole chì st'opera sprimi sta fratellanza chì ferma sempre u cimentu di a nostra isula.

In stu novu dischettu, avemu canzone nant'à a droga, i schelleri di u Bataclan, l'amore ma dinù a so famiglia cù una canzona nant'à u so figliolu "Pà Cesare", un'adattazione di a famosa nanna "O Ciucciarella", diventata "O Mammuccella", induve sta volta u figliolu parla à a so mamma, riprese in corsu di Brassens è Reggiani. Infine, Christophe Mondoloni hè dinù attore di serie è telefilmi "Mafiosa", "Duel au soleil" è teatrinu cù "La femme du boulanger".