Edmond Simeoni si n'hè andatu
2018-12-18 14:18:38

A Corsica hè in dolu. Venneri u 14 di dicembre, Edmond Simeoni, 84 anni, si n’hè andatu. U babbu di u naziunalismu corsu era uspidalizatu dapoi sabbatu scorsu in Aiacciu. Duttore di prufessione, era entratu in pulitica in l’anni sessanta è hè statu in core di l’evenimenti d’Aleria d’aostu 1975. Hà occupatu parechji mandati d’elettu autonumistu à l’Assemblea di Corsica. U 24 di nuvembre scorsu, hà ricevutu in Aiacciu u Coppieters Awards 2018, un premiu chì ricumpensa una persunalità pè u so impegnu à prò di a cultura, di a pace è di u dirittu à l'autodeterminazione di i populi d'Europa.

Nant’à u so blog è e rete suciale, « Edmond » ùn mancava mai un’occasione di cummentà l’attualità di Corsica è d’altrò. In u 2004, hà creatu à Corsica Diaspora, a reta di i corsi di fora. U so figliolu Gilles hè diventatu u primu naziunalistu à direge l’assemblea di Corsica in u 2015.