Esse è campà
2019-01-02 11:58:45

In stu terzu libru di a cullezzione "Pastori di Corsica", edizione Alain Piazzola, Pierre-Jean Luccioni s'interessa à u modu di vita di i pastori corsi fundatu da seculi di numadismu: zitellina, scularità, raporti cù l'altri membri di a sucetà, piazza di e donne in a so vita. Cum'anu fattu pè campà i strazi di a so vita fora di e cumunità ? A ghjente n'avia a paura è ogni tantu ùn eranu tenuti cari, ma i pastori s'eranu adattati benissimu à u so ambiente, è campavanu in armunia cù u mondu ingiru à elli.

Avianu u sensu di campà cum'elli pudianu, d'amparà à allughjassi, à manghjà, à vestesi... Oghje ghjornu, sti sapè fà, chì anu permessu à i pastori di traversà i seculi cù e so bande, sò minacciati. L'autore hà pruvatu à capilli è mantene a so memoria, prima ch'elli ùn sianu più in usu.