Lettera à Edimondu
2019-01-09 10:22:25

Una canzona pè mantene u spiritu è l'impegnu d'Edimondu Simeoni, Lettera à Edimondu, escerà u 15 di ferraghju di u 2019 nant'à u primu dischettu di Canta 73. Scritta, cumposta, cantata è sunata da Ghjuvan'Paulu Poletti, unu di i storichi di Canta u Populu Corsu. 

« Edimondu, ere tu mose' di e nostre mosse ». Dunque, cum'è Mosè (Moïse), chì hà scartatu l'acque pè guidà u populu è apre una strada, u persunaghju hè cum'è un prufetu o, sia ch'ella sia, un omu di a storia. Lettera à Edimondu hè un omagiu ma parla dinù di u percorsu di militante puliticu, di l'omu d'Aleria. Edimondu Simeoni, pè Ghjuvan'Paulu Poletti, era una guida in u spiritu di u Riacquistu culturale, un omu cù l'impegnu senza fine, è u canterinu prova à ritrascrivelu cù e so parolle. In u 1976, ci hè stata digià una canzona di Poletti, in omagiu à Edimondu Simeoni. Cù stu primu dischettu di Canta 73, un altru capimachja, Petru Guelfucci, vole cuntinuà à trasmette u messaghju di u duttore, militante naziunalistu.