Umagiu à Daniel Parigi
2019-01-09 18:00:58

Vint'anni fà, era cumossa a Corsica sana. L'8 di ghjennaghju di u 1999, à 38 anni, sparia Daniel Parigi ind'un accidente di mottò. Era solu cinqu'anni ch'avia fattu i so primi passi à a televisiò ma l'animatore scherzosu à più pudè ci era divintatu un veru puntellu. Quandu sbarca à a televisiò in u 1994, Daniel Parigi crea cù i so amichi di u Teatrinu l'emissione I storti. Si tratta d'un prugramma di scherzu è di parudie chì ferma torna oghje ind'e mente di i Corsi è chì hà fattu ride parechje generazione. False publicità, caricature è imitazione, cù i so cumpagni di scena, hà criatu parechji persunagi cum'è Charles Friportu, Jacques Ajaccionesi, Alain Grisgi o ancu Angelina Ristecruche. U scopu di l'emissione era di ridesi di a sucetà Corsa è di a so televisiò.

Nanzu à France 3 Corsica, Daniel Parigi era nant’à RCFM durante 8 anni cù I Scrianzati, A Ghjustra Paisana o ancu A Ghjustra Liceana. Di spiritu è di stintu, daret'à e so magagne, ci era un omu chì avia u sensu è u ghjudiziu. Ind'a so emissione U Meziornu, l'ultima ch'ellu hà prisentatu, avia sempre e parolle ghjuste. Capace à passà da u Corsu à u Francese in modu naturale è di parlà di sugetti serii o nò, era un omu astutu, onestu, seriu senza mai pigliassi à u seriu.

Ritrattu : Via Stella