Da l'annu 42, novu rumanzu di Guidu Benigni
2019-03-01 11:14:11

Autore diviziosu di lingua corsa, Guidu Benigni hà publicatu "Da l'annu 42" inde l'edizione À Fior' di carta. Un libru chì mette in risaltu u 75u anniversariu di a liberazione di a Corsica è i testimoni di stu vissutu "da rimette in memoria certi valori". Inde un'intervista à Corse-Matin, l'autore face sapè chì a tematica di a seconda guerra mundiale hè ricca in fatti storichi è ch'ella pare luntana, benchè sempre viva in la memoria di e ghjente di a so generazione. In u libru, ammenta soprattuttu l'evenimenti cumpaisani pettu à a prisenza di i suldati taliani d'occupazione.

A liberazione di a Corsica s'hè fatta principalmente da u so populu à cuntà di u 9 settembre è cun l'appoghju di e truppe sbarcate d'Algeri, d'Italia è di u Maroccu. L'occasione di ramintà ciò chì a guerra pò fà nasce di doli è di suffrenze dopu à e pretensione fasciste, è dinù u ricordu di e ghjente chì ci anu allevatu, educatu, nutritu, i nostri valori, usi, difetti è stravie pè fà riflette a nostra giuventù.