Romanica, u primu ghjocu video pè amparà e lingue rumaniche
2019-03-21 14:55:47

U ministeru di a Cultura hà creatu u primu ghjocu video di rigalu, Romanica, pè mette in risaltu e lingue rumaniche, frà quesse u corsu. Cusì, u  ministeru vole sensibilizà a ghjente nant'à a diversità linguistica è a francufunia. Stu ghjocu hè dispunibule nant'à Apple App Store è Google Play. Ghjè u primu ghjocu induve si pò ghjucà cù ottu lingue rumaniche (corsu, francese, rumenu, talianu, spagnolu, portughese, catalanu è occitanu) senza bisognu d'amparalle. 

Romanica hè un mondu induve si parla solu una lingua è induve tutti l'abitanti s'annoianu. U ghjucadore serà l'eroe di l'aventura è deverà fà rinasce a diversità di e lingue. Per quessa, ci vole à truvà a significazione di e parolle oghjinche, classificate in temi da u più faciule à u più difficule, è ricunnosce in chì lingue rumaniche sò aduprate. Cum'è in altri ghjochi simuli, ostaculi s'affaccanu pè cumplicà l'azzione.