Carmini, u novu dischettu di Patrizia Gattaceca
2019-04-03 11:58:31

U 13 d'aprile, escerà u novu dischettu "Carmini" di Patrizia Gattaceca. Un'opera dedicata à u famosu scrittore è filosofu Paul Valery. Patrizia ci presenta a so interpretazione cummuvente in lingua corsa di sti puemi magnifichi tradutti da Ghjacumu Thiers è messi in musica da Jean-Bernard Rongiconi. In più, un clip accumpagna l'opera è si pò vedelu nant'à You Tube, rializatu à l'università di Corsica da Armand Luciani. Mette in scena a ballarina Barbara Maria Brecqueville è di sicuru Patrizia Gattaceca chì canta a canzona "Internu". 

Dapoi più di 40 anni, Patrizia Gattaceca hè nant'à a scena è hà ottenutu tante ricumpense è successi regiunali, naziunali è internaziunali musicali quant'è litterari, in particulare u Grande Premiu 2019 di a Cullettività di Corsica pè u so ultimu libru "Cantu in Mossa", edizione Albiana. L'artista hè dinù scrittrice, insignante di corsu à l'università, cummediante è animava l'emissione I Sapientoni nant'à Via Stella.