Da francà u mali, u primu dischettu di u gruppu Cuscenza
2019-11-13 09:48:50

U gruppu Cuscenza hè natu in u 2015. Studianti à l'Università, ani decisu di creà un gruppu par dà una voci nova à u cantu suttanacciu, facendu di sta passioni un'opara culturali è forse una rivindicazioni suciali. "Semi ingrandati ind'una epica strana induva una parta di a ghjuventù corsa si perdi. Ma ci hè sempri un caminu ghjustu, una strada diritta, quidda di a cultura, di u suciali, di l'amori di a so tarra è di l'impegnu. Hè unu di i missaghji maiò ch'è no' vulemu sprimà à traversu stu dischettu." spieca Simon Paulu. In a so bocca u missaghju hè chjaru, in i so ochji l'indiatura hè schietta. 

Dopu à a canzona popularia "U cantu di l'Orsu" ripresa cù fervori da i sustenidori di l'ACA è ancu aldilà, si sò lampati in cumpusizioni più fini è literarii. Anu girandulatu a Corsica, quì è culà, pà finanzà tuttu u materiali necessariu à a criazioni di l'album. Qualchì annu dopu, à forza di travagliu è di sudori, ci sò ghjunti. U dischettu "Da francà u mali" hè statu arigistratu à u studio Ricordu. Surtarà l'8 di dicembri, pà a festa di a Nazioni, una simbolica chì ni dici mori nant'à i cantadori.

I temi aduprati in st'opara vanu da a spiculazioni à a lingua... passendu pà l'accidenti murtali nant'à i stradi corsi, una disgrazia impurtanti in Corsica ma ch'hè pocu missu in lumi in a canzona isulana, è chì Cuscenza hà sapiutu dinuncià. U gruppu dà un filu novu à u cantu, tinendu un ochju nant'à u passatu è fighjulendu l'avvena... cù a so cuscenza.