Conca: A Punta di l’ortu appronta a festa di a Nazione
2019-11-21 15:27:41

L'associu A Punta di l'Ortu festighjeghja i 20 anni di l'associu, è a 21sima celebrazione di a Festa di a Nazione u sabbatu 7 di dicembre in Conca. Serà celebrata à 6 ore, in chjesa San Stefanu, una messa sulenna cantata cù Monsignore Olivier de Germay, I Muvrini è sette cunfraterne, seguitata da una prucessiò, una granitula è a Muresca. Un grande cuncertu sott'à un tendone scaldatu hà da esse prupostu à 8 ore è mezu cù numerosi gruppi è cantadori. Ci serà da beie è da manghjà. Entrata 10 euri.

Micheli Leccia è i membri di l'associu facenu sapè chì a festa averà un aspettu infurmativu cù trè intervenzione pè spiegà a storia di sta "ripresa" di a Festa di a Nazione, una vintina di bandere pè mustrà l'evuluzione di a bandera corsa, e sfilate si feranu in custumi cusgiti da i cunchesi è infine fiure seranu diffusate nant'à i screni sott'à capitellu. Cum'è tutti l'anni, a bandera di 300 m2 serà azzingata nant'à a Punta di l'ortu è dopu nant'à a Punta calcina.