L'opere di Micro-Folie in lingua corsa
2019-12-20 10:03:42

Stallatu in Bastia à u centru culturale Una Volta sin'à u 3 di ghjennaghju di u 2020 è dopu à u centru suciale François Marchetti da u 13 di ghjennaghju à u 26 di ghjugnu di u 2020, u museu numericu Micro-Folie prupone parechje millaie d’opere d’arte venendu da e grande istituzione naziunale è internaziunale. Una Volta è a Cità di Bastia pruponenu st'opere pè a prima volta in lingua corsa è puderanu ancu esse cunsultate prestu in e Micro-Folie di Bunifaziu, Carghjese è Cuzzà è sin'à l'istituti francesi di New-York, Rangoon o Dubaï !

A pezza centrale di u Micro-Folie hè un museu numericu sottu a forma di un’appiecazione chì face cullegà capi d'opere da scopre di modu digitale, cumpunendu una galleria d’arte virtuale unica, chì mischja arti visuali, architettura, design, spettaculu vivu è cuntinuti scentifichi. Un cuntenutu pedagogicu cuncipitu da i cunservadori di i musei partinarii chì accumpagnanu u sfilà di l’opere. 

L'insignanti di e scole bislingue, i prufessori di corsu, l'associ di lingua corsa, puderanu ghjuvassi di l'arnese Micro-Folie pè trasmette parechje cumpetenze: storia di l’arte, ascoltu musicale, storia è geografia diventeranu vettori di a lingua corsa.