L'amore piattu, l'opera di vita di Francesca Desideri
2020-01-03 09:55:15

U libru bislingu di Francesca Desideri, à l'edizione D'Octobre, hè quellu d'una donna chì hà sempre racoltu piante medicinale, frutti, erbe è frundami pè appruntà robba bona. U titulu hè quellu d'un fiore scarsu è preziosu chì si trova nant'à a cuprendula, è dopu di sicuru rimanda à l'amore di a natura è u piattu. Cunniscenza è gastronumia, naturale è bon gustu. St'opera hè fatta pè sparte è trasmette. A so storia principia ind'una casetta in legnu di pastore assestata da Francesca Desideri. Sta casetta hè u so laburatoriu di savori in leia cù i gusti, i muschi è u sguardu. Un museu chì cambia secondu e stagione, l'odori è l'estru. "L'amore piattu" serà oramai a so anima litteraria è ci si pò leghje dinù ricordi, stalvatoghji, tradizione è sosule. Un libru pè l'innamurati di a natura !

Sabbatu u primu di ferraghju, Francesca Desideri serà l'invitata di l'ADECEC pè una presentazione di u so libru è dediche. Petru Ghjuvanni Luccioni l'accumpagnerà pè u libru "Pastori è reghjoni" à l'edizione Alain Piazzola. "L'amore piattu" si trova in e librerie A Piuma lesta, Papi è Album in Bastia. Point presse Ambrogi in L'Isula. Si pò cummandallu dinù mandendu un mail à l'indirizzu d.octobre@yahoo.com cù pagamentu aghjuntu o telefunà à u 04 95 36 60 01