A casa di e scienze in Bastia
2020-02-15 10:07:31

Sabbatu u 15 di ferraghju di u 2020, a casa di e scienze hè stata inaugurata in Bastia, quartiere di Lupinu, vicinu à u centru culturale L'Alboru. Hè stata inaugurata da u prufessore Axel Kahn, anzianu cercadore in genetica, presidente di a Liga naziunale contr'à u cancheru è autore di parechji libri. In sta casa, si trova un auditoriu chì pò diventà un spaziu d'immersione, attelli pè i sculari è u publicu. Un'altra sala di 80 m2 pè e spusizione tempuranee è una terza sala pè una museugrafia originale in leia cù l'ambiente è a tennulugia. Avemu dinù spusizione bislingue, spaziu di rialità virtuale, clip multimedia, prughjezzione di video, ologrammu, muru sunoru cù scientifichi chì rispondenu à dumande, opere interattive. Stu novu locu purghjerà à i sculari risorse pedagogiche scientifiche innuvente. I temi di e spusizione sò, frà altru, u cambiamentu climaticu, l'energie è e suluzione di dumane, e tennulugie di u futuru, ambientale... 

Un prugettu creatu da prufessiunali, frà quessi Fabrice Fenouillère, direttore di u Parc Galea, è a so squadra chì anu creatu a museugrafia di u locu. Scientifichi anu sustenutu u prugettu: in più di Axel Kahn, l'autore è giurnalistu specialistu di e dumande ambientale, Frédéric Denhez, u paleontologu Yves Coppens, u climatulogu Jean Jouzel è u specialistu d'infurmatica Jean-Gabriel Ganascia. A casa di e scienze hè u risultatu d'un investimentu di 2,6 milioni d'euri finanzati da u cuntrattu di cità, l'Europa è a Cullettività di Corsica.

Ritrattu : Corse-Matin