Corsican language between past and future challenges
2020-05-15 10:04:01

"International journal of the sociology of language" hè una rivista scientifica primurosa à livellu internaziunale. Sta famosa publicazione hà cunsacratu un numeru tematicu à a lingua corsa cù articuli di cercadori isulani è specialisti internaziunali. Rumanu Colonna, maestru di cunferenze à l'Università di Corsica, hè statu u cuurdinatore d'una squadra di cercadori chì hà prupostu, di marzu 2020, u numeru tematicu cunsacratu à u corsu in sta rivista. Un numeru in memoria d'Alexandra Jaffe, sociolinguista americana chì avia fattu di a Corsica è di a so lingua u core di e so ricerche. Stu prugettu hè natu durante un cullocchiu urganizatu, di lugliu 2013, à l'università cù quasi 150 cercadori venendu da una sessantina di paesi. Frà elli, Ofelia Garcia, direttrice di a rivista americana.

Ci vulia à mustrà chì, in fattu sociolinguisticu, u corsu raghjunghje una prublematica internaziunale. Cercadori d'altrò cunnoscenu l'isula, a lingua corsa è anu digià publicatu nant'à u sugettu. In stu numeru, sò state messe in risaltu e particularità di a situazione corsa è e so sumiglie cù altre situazione. U fenomenu di standardizazione di e lingue, di minurazione linguistica, a quistione ghjuridica, i prucedimenti pulitichi si trovanu inghjilocu. Dunque, a rivista prupone assai temi (puliticu, istituziunale, legale, ecunomicu, plurilinguisticu...). I cercadori corsi di sta rivista (Jacques Thiers, Alain di Meglio, André Fazi, Romain Colonna è Sébastien Quenot) riprisentanu e trè generazione di sociolinguisti chì travaglianu in u polu sociolinguisticu di l'università, dapoi l'apertura di u stabilimentu.