Roccu Mambrini : omagiu di Tittò Limongi
2020-07-15 09:17:04

L’ultimu volu

Oghje ci hè ghjunta da Ziglia
Una pessima nutizia
È a pena ci si piglia
Senza cede à l’avarizia
Chì vi pare una famiglia
Quandu hè cara l’amicizia.

Hà persu a nostra cultura
Un cusì caru figliolu
È per sprime a so primura
Quì a Musa scrive in dolu
Hè scuntenta ancu a natura
Hè partutu u Rusignolu.

Hè passatu in ogni locu
Per risponde à ogni chjama
Hà incesu u so focu
Quellu chì vi s’imbalsama
È fù di più chè un ghjocu
Chì ormai u riclama.

S’hè sappiutu fà un nidu
Di e stonde puetesche
Armuniosu, lindu è fidu
Rime doppie è rime nesche
Incantatu u so gridu
Puru mentre e notte fresche.

Nè di merlu biancu o neru
O di falcu o d’altore
Di culombu messageru
Pudia un inviglia corre
Era un acellu fieru
Rusignolu incantadore.

Quandu un pueta parte
Ferma sempre un pocu d’ellu
Perchè uffrendu u so arte
Pò vive in ogni scurnellu
Quant’ellu hà sappiutu sparte
Roccu dettu Rocchicellu.

Quandu c’era un principiante
Pocu impreme u lucale
Roccu ùn li lagava frante
Ma canzone amicale
U so core era gigante :
U pigliava sott’à l’ale.

Emu avutu a furtuna
Di cantà inseme assai
A passione era cumuna
Si facia senza guai
Fin’chì l’acu hà una cruna
Prumettu, ùn pianterà mai.

Forse Diu era decisu
Di cantà cun ellu solu
Ch’ellu ci mandi un surrisu
Da quassù, u Rusignolu
Ch’hè partutu in paradisu
À sparghje u s’ultimu volu.

Tittò u primu di lugliu di u 2020