Cristofaru Culombu, Corsu Niulincu
2020-07-24 12:02:32


Vittore Geronimi, autore di "Christophe Colomb Corse du Niolu 1445-1506", un’autuedizione di settembre 2017, vene di fà publicà in stu lugliu 2020, a traduzzione corsa "Cristofaru Culombu Corsu Niulincu 1445-1506" fatta da Luigi Giacomoni.
U libru cumprende 172 pagine in A4, cun belle illustrazione in culore, realizate da a stamperia Copymedia, avenue de Guitayne, 33610 Canéjan.
Ghjè tutta a storia di Cristofaru Culombu, scupridore di l’America è antenatu di l’autore. Sapendu a so origine enimmatica, a teuria di Vittore chì u face nasce in Calacuccia, ci surprende è merita d’esse cunnisciuta. A spiega gratusine à l’antrupunimia, a tupunimia, a storia, l’oralità è in parte cù a genealugia.
Cristofaru Culombu nativu di Calacuccia, in a torra di « E Namanacce » o Bonemanaccie, di a famiglia « Gieronimo » chì pussedia u stazzu di u Ruzatoghju in valle di Rughja dentru a furesta di Culombu, vicinu à Ghjirulata. Avendu pigliatu pratesa per l’Aragunesi, i Niulinchi funu persecutati (1459) ed ebbenu i so lochi di pastura distrutti da i Ghjenuvesi. Cusì vense l’appellazione a « Balagna diserta».
Cristofaru di Dumenicu 14 anni s’esiliò in Napuli. U futuru Cristophor’ Colon’ si spiega Cristofaru originariu di a furesta Culombu. Nant’à i so mappamondi ellu cù u so fratellu Bartulumeu : « Christopharus et Bartholomeus Columbus de terra rubra », terra rubra per e terre di Rughja, indichendu u culore rossu.
Assai altre indicazione storiche facenu di stu libru una bella riferenza di cunniscenze chì u lettore scuprerà. Vittore Geronimi ci face sapè a so immensa cultura. Traduttu in corsu ne dà più risaltu à Cristofaru Culombu è ghjè ancu una prumuzione per a lingua corsa per via chì Cristofaru Culombu interessa u mondu sanu.
Auguremu successu à stu libru scrittu prima in francese, oghje in corsu è forse dumane in altre lingue. U prezzu 38 euri. Indirizzassi à l’autore Vittore Geronimi calacuccese ma stendu in Bravone (20230) o pudè truvà u libru in libreria. Una dedica seria a benvenuta dinù.

Origine: estricuntrasti.xooit.fr