Trà passione è miseria, a canzona di i Voci di a Gravona in umagiu à Maradona
2020-12-05 10:16:53

U gruppu I voci di a Gravona hà dedicatu una canzona à u ghjucadore argentinu sparitu a settimana scorsa. Scritta è cumposta da Ghjaseppu Franchi, Trà passione è miseria si vole un umagiu à l'omu di "a manu di Diu" è escerà sopra u discu novu di I voci, d'aprile prossimu. U titulu "Tra passione è miseria" hè un'uchjata à tutti 'ssi zitelli chì crescenu in a miseria, è chì ghjocanu quantunque à ballò in i carrughji, scalzi è felici. U ballò hè per elli una manera di fughje issa miseria, di stantà u so pane è, podassi, mette fora di bisognu a so famiglia. Hè a storia di Maradona. Sta canzona si pò sente nant'à Facebook.