Sta mane, affacca a musa
À cheremi qualchì versu
Provu à circammi una scusa
Ma a feraghju listessu 
Chì l’aghju trova dillusa
Fiacca è u sguardu persu 

Ma à pate è à strazià
Credu ch’ella ùn hè stata a sola 
L’annu Vinti ognunu a sà
Ci hà scucculatu di piola 
Cum’è forse cent’anni fà 
Quella grippaccia spagnola

Ciò ch’hè accaduta quì  
Nimu ci vulia crede
Anc’avà ùn si pò dì
Nè manc’à pena prevede
Chì quand’ellu cerca o capì
Omu ci perde a so fede 

À parenti è à amichi 
Vogliu dì a cumpassione 
Chì di quessi i castichi 
Ùn si trova paragone 
Nè in tanti passi antichi
Nè in tempu di Babbone

Ricurdemuci chì annu
A dicu ch’hè bella chjara 
Di u Covid u malannu 
Ùn si ne sentia a fiara
Ma dopu hà stesu u so pannu 
Sopr’à la Corsica cara

Ci hè vulsutu à spiculà
Prima cù l’infurmazione
Luntanu o da mare in là
À spizzicà spiegazione 
Ma in tantu, è fà è fà  
Vinti ci hà messu à taglione

Tandu n’hà fattu pappina
È suminatu u tramannu
Stinzendu quella curtina  
Di u so murtale ingannu 
Pront’à pregacci ruvina 
Sin’à l’ultimi di l’annu

O Vintunu chì venite 
Fatene puru spazzosa 
Di tante stonde rimite 
È di st’annata ritrosa  
Poi s’è a ci permettite  
D’apre quella porta chjosa 

Fà chì i nostri mesi à vene
Porghjinu ciò chì ci piace
Chì a forza chì ci tene
È sta voce ch’ùn si tace 
Possanu invità l’Avvene
À sparghje Salute è Pace 

S’u frate l’hà cù a sora 
Noi quì guardemu piove
È m’arreghju chì ghjè ora
Mi trica u tempu di move
Per ma più lascialle fora
Tutte ste sperenze nove

Saveriu Luciani