Premiu Timpesta 2021 – 6a edizioni
2021-01-22 17:33:50

Com'è tutti l'anni di ghjinnaghju, u mumentu hè vinutu d'annuncià l'apartura di u Premiu Timpesta ! Quist'annu sarà a siesima edizioni, è com'è sempri, da vincia, ci sarani a gloria è uni pochi di libri! Ramintemu chì i testi sò da mandà – prima di u mesi di maghju – par via di messenger/facebook à un membru di u Cumitatu di ridazzioni di Tonu è Timpesta o à l’adrizzu siguenti : marco.biancarelli@orange.fr   
Rigulamentu :  Tematica : quist’annu, pà a prima volta, ci sarà una tematica : ci vularà à prupona una nuvella chì parla d’un cuntestu, storicu o sucitali, chì si passa à u XIXu seculu (ben sicura tuttu pò essa fittivu, ma a cundizioni chì i parsunaghji evuluessini à u XIXu hè ubligatoria, chì a storia si passessi in Corsica o in altrù). I testi ùn devini varcà i 6500 carattari. Al dilà, u testu ùn sarà micca ritinutu. Un testu traduttu da un’altra lingua hè accittatu, ùn circhemu micca à sapè di chì manera scrivini l’autori, solu premi u risultatu finali in corsu.  U premiu maiori sarà rimissu da una ghjuria cumposta da una vintina di scrittori o passiunati di literatura. Dopu à Alessandro De Roma è Jérôme Ferrari, u prisidenti ni sarà quist’annu Pierre Gambini, musicanti è pueta, è attori culturali maiori impignatu in tutti i duminii artistichi. I testi ghjà publicati ùn poni participà à u cuncursu, ma i scritti d’attellu o missi in linea nant’à i blogghi cunfidinziali sì. I testi ricivuti sò missi in linea à for’ è à misura ch’iddi ghjunghjini, una volta letti è accunsintiti da u Cumitatu.

ATTINZIONI : pà raghjoni di tempu, ùn ci sarani micca currizzioni arricati, i scritti sarani musciati tali è quali ch’iddi ci parvenini, è quissi cù troppi sbagli ùn sarani micca ritinuti (cunsigliemu dunca di fà rileghja da parsoni avvizzi nanzi di mandà i pruduzzioni). Cù u Premiu Timpesta, sarani rimissi dinò un Premiu di i Littori è un Premiu Rivilazioni attribuitu da u Cumitatu di Tonu&Timpesta. Avali, tocca à vo’ ! È tandu, v’auguremu a paci, a saluta è una bedda ispirazioni à tutti !   

I membri di u Cumitatu : Jean-Yves Acquaviva, Joseph Antonetti, Marc Biancarelli, Stefanu Cesari, Fabien Raffalli, Nicolas Rey, Jean-François Rosecchi, Pierre Savalli.