Pirru è Ricuccata: a Petra di i Talavesi
2021-01-23 09:40:27

Cù Pirru è Ricuccata, l'associu Realità ci prupone un'immersione in lingua corsa, per i zitelli è i maiò, ind'e ricchezze di u patrimoniu, l'animali è i lochi chì rispechjanu l'anima di sta terra. Pirru è Ricuccata, l’orsu è a tupinetta, seguitanu u Pinzachju in terra di Signori, in Pumonte in cerca di un ogettu sacru, u cornu sacru di a Corsica. Quì, i nostri amichi anu da piglià i chjassi di a Cinarca è di l’Ornanu, scuprendu dinù Aiacciu, scuntrendu amichi è nemichi. Dunque, ghjè un arnese pè fà scopre u patrimoniu è a ricchezza di a lingua cù u ghjocu è a pedagugia. 

Dopu à u tomu 1 (2018), U cornu sacru ind'a regione bastiaccia, u tomu 2 (2019), L'Oru di a Balagna, eccu u terzu tomu nant'à a regione aiaccina A Petra di i Talavesi. Un libru sempre cù e belle illustrazione di Fabien Mariani è un dischettu audio musicale (musica di Bernard Ferrari), è e voce di Doria Ousset (Ricuccata), Paul Turchi-Duriani (Pirru), Anna Rocchi (a narratrice), Anghjulu Mari (U pinzachju), Ceccè Buteau (l’apa), Lea Antona (a farfalla), Frédéric Antonpietri (u magu), Ghjuvan Micheli Weber (u cursinu), Frédéric Poggi è Xavier Tavera (e cuppulate)... Un quartu libru-dischettu hè previstu pè cuntà l'aventure di Pirru è Ricuccata in u stremu sudu, da Purtivechju, Bunifaziu à l'Alta Rocca.