Clip Corsu d'Antone Ciosi è altri artisti
2021-08-05 14:35:41

Qualchì settimana fà, hè esciutu u clip “Corsu” d’Antone Ciosi, rializatu à a citadella di Corti è u pudite vede nant’à e rete suciale. Sta canzona di u doppiu dischettu Duetti chjama à l’unione di i tutti i corsi. Pè purtà u so messagiu, u canterinu hà sceltu giovani artisti isulani: Jean-Charles Papi, Felì, Maxime Merlandi, Doria Ousset, Arnaud Giacomoni, Francè Zito, Lea Antona, Jean-Louis Simonpieri, Christophe Mondoloni è i zitelli di Cervioni. Una scelta pè simbulizà a nuzione di trasmissione di a nostra passione, di a nostra cultura, trà e generazione di corsi è di canterini corsi. U prugettu era di prupone à artisti isulani di participà à a rializazione di stu clip pè simbulizà u messagiu d’unione di a canzona è a trasmissione di a fiaccula trà Antone Ciosi è a nova generazione.

U locu di u clip, rializatu di maghju 2021, ùn hè micca statu sceltu à casu. A citadella di Corti hè un locu simbolicu pè Antone Ciosi è pè i corsi. Un locu d’incantu pè parlà à tutti i corsi da a capitale di l’isula. Locu d’emuzione è di ricordi pè u canterinu, in particulare quellu di u cuncertu in Corti in u 1973. U doppiu dischettu Duetti, esciutu di settembre 2020, hè statu presentatu à u festivale di a canzona corsa, teatru di u Casone in Aiacciu da u 9 à l’11 è u 16 d’aostu. Per via di a crisa sanitaria, ùn hè mai statu presentatu nanzu. Nove date di l’“Ultimu giru” d’Antone Ciosi deverebbenu esse presentate à a fine di l’annu 2021. Dopu più d’annu è mezu senza scena, a cultura corsa hà bisognu di sprimesi.