Si n’hè andatu à l’Eternu Lisandru Bassani…
2021-08-20 11:45:43

A Corsica pienghje un figliolu.

Di Lisandru, paisanu zicavese, parechji diceranu ch’ellu era un culturale, sempre prontu à difende è à prumove a lingua è a cultura di u Populu Corsu. Hè più chè vera.

Militente di a Causa dipoi tant’anni, attore hè statu anch’ellu di u Riacquistu, è tutt’ognunu sà ch’ellu hà trasmessu sin’à i ghjorni d’oghje di più chè cusì, à vechji è zitelli, senza risparu.

Ci serebbe tantu à dì, postu ch’ellu era scrittore, animatore di a FALCE, sociu di u Cunsigliu Economicu, Suciale è Culturale, è ch’ellu participava à tant’opere è evenimenti à prò di a lingua è di sta terra.

Era di sta generazione di corsi insignanti, di ste leve custrette à spatriassi tant’anni fà, poi ch’anu fattu a scelta maestra, una volta vultati in casa soia, di participà di manera attiva, cù tamanta fede è tamantu fiatu, à e mosse di u Settanta.

Lisandru si n’hè andatu, è cù tutti i soi, stasera a lingua corsa ne porta u dolu.

O Lisà, à tè a Corsica Regina.

Saveriu Luciani