A canzona Sintineddi, simbulu di sulidarità cù i Libanesi
2021-09-10 12:02:26

A famosa canzona di Canta u populu corsu hè stata ripigliata da a Libanese Pascale Ojeil è Jean-Charles Papi, rispettivamente cumare è cumpare di l'associu Le Cèdre Corse chì sustene l'educazione à u Liban, aiuta e famiglie povere à pagà a scularità di i so figlioli. Stu paese hè statu culpitu, d'aostu 2020, da una splusione tamanta nant'à u portu di Beyrouth. L'associu hè statu creatu in Corsica da u patre Louis El Rahi, d'aprile 2021. Nanzu, Pascale Ojeil avia digià ripigliatu "À l'altru mondu" di i fratelli Vincenti in omagiu à e vittime.

Arrigistrata trà u Liban, a Republica Cecca è i studios Ricordu in Bastelicaccia, sta nova versione di "Sintineddi" hè stata publicata nant'à u canale You Tube di Pascale Ojeil.